«Հունվարի մեկից երրորդ երկրներից ՀՀ ներմուծվող որոշ ապրանքների մաքսատուրքերի դրույքաչափերի աճ կլինի՝ կաթի փոշի, խոզի ճարպ, հավի միս…խոսքը մոտ երկու հարյուր առաջնային անհրաժեշտության ապրանքների մասին է, որոնց գները կբարձրանան»,-«Բլից ինֆո» մամուլի ակումբում լրագրողների հետ հանդիպմանն այսօր ասաց ՀՅԴ Բյուրոյի տնտեսական հետազոտությունների գրասենյակի պատասխանատու, տնտեսագետ Սուրեն Պարսյանը:
Նրա գնահատմամբ՝ գնաճը հավելյալ ճնշումներ կառաջացնի տնտեսության համար. «Կառավարությունը համապատասխան ծրագրեր պետք է մշակի այդ ուղղությամբ»:
Ըստ փորձագետի՝ քանի որ նշյալ ապրանքները թանկանալու են, պետք է փորձել դրանք ՀՀ-ում արտադրել կամ ԵՏՄ-ից ներմուծել մրցունակ գներով:
Պարսյանը հիշեցրեց, որ վերջին ամիսներին էլ առաջնային անհրաժեշտության պարենային մթերքների՝ կարտոֆիլի, ձվի, կարագի գնաճ է նկատվել. «Դա պայմանավորված է գյուղատնտեսության ոլորտում որոշ մշակաբույսերի անկմամբ՝ կարտոֆիլ, կաղամբ, ծաղկակաղամբ… Մարդիկ դրանք հիմնականում պահեստավորում են ձմռան համար, ուստի գնաճը կշարունակվի, որովհետեւ պահանջարկը մեծ է, առաջարկը՝ քիչ»:
Լուիզա ՍՈՒՔԻԱՍՅԱՆ
