Երկրի ներսում թշնամի ամենեւին չփնտրողների շարքում թերեւս կարելի է առանձնացնել ԱԱԾ տնօրեն Արթուր Վանեցյանին: Հոկտեմբերի 16-ին, որ Հայ մամուլի օրն է, նա յուրովի «շնորհավորեց» իրեն հարցեր տվող լրագրողներին:
Ավելի կոնկրետ, Արթուր Վանեցյանը մասնավորապես հայտարարեց. «Անբարեխիղճ լրատվամիջոցներ կան, որ Վանեցյան ազգանունը գրելու համար մեծ գումարներ էին վերցնում, վարկեր են փակել արդեն: Անկեղծ եմ ասում: Իմ մասին մի հոդված գրելու համար 3-4 մլն դրամ գումար են վերցնում: Ես դատի չեմ տալիս, որ չասեն՝ ԶԼՄ-ների նկատմամբ ճնշումներ կան»:
Տրամաբանական հարցին, թե ովքեր են պատվեր տվողները եւ կատարողները, ԱԱԾ տնօրենը հակադարձեց, թե անուններ չի տալու:
Գիտե՞ք ինչ, սա խառնակչական պահվածք է, ԱԱԾ տնօրենի պաշտոն զբաղեցնող, այս ոլորտում ստաժ ու մասնագիտական պատրաստություն ունեցող անձնավորությանն անհարի՛ր պահվածք:
ԱԱԾ տնօրենի ասածը «անձնականով դատի տալու» հարց չէ: Եթե ԱԱԾ տնօրենն ունի կոնկրետ տվյալներ, որ այսինչ լրատվամիջոցը կամ լրագրողը իր ազգանունը գրելու, այսինքն՝ քննադատելու, վարկաբեկելու համար «իքս» պատվիրատուից գումար է վերցրել, ապա թող այդ տվյալները, իսկ հաշվի առնելով իր ներկայացրած կառույցն ու դրա աշխատանքի բնույթը՝ օրինական կարգով ձեռք բերած ապացույցները հրապարակի:
Այլապես ԱԱԾ տնօրեն Արթուր Վանեցյանը միտումնավոր փորձում է վարկաբեկել բոլո՛ր լրատվամիջոցներին, բոլո՛ր այն լրագրողներին, ովքեր այս ընթացքում քննադատաբար են անդրադարձել իր պաշտոնական գործունեությանը, իր գործողություններին, լինի ԱԱԾ-ի հետ կապված թե ֆուտբոլի ֆեդերացիայի:
ԱՐՄԵՆ ՀԱԿՈԲՅԱՆ
Հոդվածն ամբողջությամբ կարդացեք «Հայոց Աշխարհ» օրաթերթի այսօրվա համարում
