ՀՀ-ում ԱՄՆ դեսպանատանն այսօր լրագրողների հետ հանդիպմանն ԱՄՆ փոխպետքարտուղարի տեղակալ Ջորջ Քենթը, անդրադառնալով ԱՄՆ նախագահի ազգային անվտանգության հարցերով խորհրդական Ջոն Բոլթոնի՝ առաջիկայում ՀՀ սպասվելիք այցին, նշեց, որ նա կլինի նաեւ կովկասյան տարածաշրջանի այլ երկրներում ու Մոսկվայում:
Լրագրողները հետաքրքրվեցին՝ ԱՄՆ-ի համար ի՞նչ նշանակություն ունի այն փաստը, որը ՀՀ-ն սերտ գործակցում է ամերիկյան պատժամիջոցների ներքո հայտնված Իրանի դեմ: «ԱՄՆ-ն հասկանում է, որ ՀՀ-ն օրհնյալ քաղաքացիներ ունեցող երկիր է, բայց նա դժվար հարեւաններ ունի: Հասկանում ենք այն մարտահրավերները, որոնք ՀՀ-ի առաջ են՝ տարածաշրջանային առեւտրի տեսանկյունից, սակայն մեզ շարունակում են մեծապես մտահոգել Իրանում ռազմական եւ պետական տարրերը, որոնք նպաստում են տարածաշրջանային անկայունությանը»,-նախ ընդգծեց Ջորջ Քենթը:
Նա հիշեցրեց՝ ԱՄՆ-ն տարիներ առաջ մի քանի այլ երկրների հետ բանակցեց Իրանի միջուկային ծրագրի շուրջ, սակայն դա չօգնեց, որպեսզի Իրանը վերջ տա իր ապակայունացնող դիրքորոշմանը. «Նա աջակցում է Սիրիայում Ասադի ռեժիմին, «Համաս»-ին, «Հիզբալլահ»ին…Այդ քաղաքականության պատճառով անմեղ քաղաքացիներ են տուժում Սիրիայում: Բոլթոնի այցի ժամանակ կարելի է ակնկալել շիտակ քննարկումներ՝ տարածաշրջանային անվտանգության հարցերի շուրջ»:
Լրագրողների հարցին, թե արդյոք հնարավո՞ր են ԱՄՆ-ի կողմից պատժամիջոցներ Իրանի բարեկամ ՀՀ-ի հանդեպ, Ջորջ Քենթը չպատասխանեց, միայն նշեց. «Մեր պատժամիջոցների թիրախում կոնկրետ իրանական ընկերություններ են: Հայկական ընկերությունները, ինչպես եւ վրացական ու ադրբեջանական, պետք է իմանան, թե ովքեր են իրենց իրանական գործընկերները: Այո, մենք հորդորում ենք որոշ իրանական ընկերությունների հետ առեւտրային հարաբերություններ չձեւավորվել, քանի որ հնարավոր է՝ դրանք պատժամիջոցների տիրույթում լինեն»:
Քենթը նաեւ հայտնեց, որ պատժամիջոցների հարցերով մասնագիտացած ամերիկացի պաշտոնյաները նոյեմբերին կայցելեն ՀՀ՝ իրանական ընկերությունների հետ առեւտրային հարցերի շուրջ հանգամանալից խոսելու հայաստանյան ընկերությունների ներկայացուցիչների հետ:
Լուիզա ՍՈՒՔԻԱՍՅԱՆ
