Ազգերի լիգայի չորրորդ տուրում վաղը կայանալիք Հայաստան-Մակեդոնիա հանդիպումից առաջ Մակեդոնիայի ազգային հավաքականի գլխավոր մարզիչ Իգոր Անգելովսկին Վազգեն Սարգսյանի անվան «Հանրապետական» ստադիոնի մամուլի ասուլիսների սրահում լրագրողների հետ հանդիպման ժամանակ ասաց. «Մենք հաշվի չենք առնելու նախորդ տուրում Հայաստանի՝ Ջիբրալթարից կրած պարտությունը եւ վաղը կենտրոնանալու ենք մեր գործողությունների վրա: Այդ պարտությունը կարող է ավելի մոտիվացնել ձեր ֆուտբոլիստներին, որոնք կփորձեն վաղն ավելի լավ խաղ ցուցադրել»:
Մակեդոնիայի հավաքականի ավագ Գորան Պանդեւն իր հերթին նշեց. «Հայաստանը լավ որակներ ունեցող թիմ է: Ի սկզբանե, մենք մտածում էինք, թե Հայաստանն ու Մակեդոնիան կպայքարեն խմբում առաջին տեղը գրավելու համար: Մենք արդեն ունենք ինը, Հայաստանի հավաքականը՝ երեք միավոր: Բայց դա նշանակություն չունի: Մենք վստահ ենք, որ վաղվա հանդիպումը կընթանա համառ պայքարում»:
Գլխավոր մարզիչը նաեւ հավելեց, որ իրենք դեռ չեն մտածում Եվրո-2020-ում որակավորվելու մասին, եւ իրենց բոլոր մտքերը կապված են վաղվա խաղում դրական արդյունք ստանալու հետ:
Աշոտ ՀԱԿՈԲՅԱՆ
