Ֆրանկոֆոնիայի գագաթնաժողովի շրջանակում Հայաստան են ժամանել Ֆրանսիայի «Մեծ Արեւելք» մասոնական օթյակի մեծ վարպետի տեղակալ Մոհամեդ Աիտ-Արաբը, օթյակի խորհրդի անդամ, միջազգային և ֆրանկոֆոնիայի հարցերի պատասխանատու Դիմիտրի Արսենակիսը, օթյակի խորհրդի անդամ, Եվրոպայի գծով հարցերի պատասխանատու Էղվե Զաքարիանը, կազմակերպության այլ անդամներ:
Aravot.am-ի հետ բացառիկ հարցազրույցում «Մեծ Արևելք» մասոնական օթյակի մեծ վարպետի տեղակալ Մոհամեդ Աիտ-Արաբը խոսելով Հայաստանում 17-րդ գագաթնաժողովի անցկացման թեմայով, ասաց. «Նախ պետք է փորձել ձերբազատվել մի քանի հին մտքերից, կաղապարներից, որոնք ասոցացվում են Ֆրանկոֆոնիայի հետ:
Պահպանելով հիմնադիր հայրերի գաղափարները 2018թ. Ֆրանկոֆոնիան մեկ այլ գործառույթ ունի, որի մասին նախագահ Մակրոնը հայտարարել է իր խոսքում: Ֆրանկ մասոնների համար ֆրանկոֆոնիան նախ եւ առաջ պետք է լինի այնպիսին, որ կենտրոնում մարդն է, մարդը՝ մեծատառով եւ հումանիստական գաղափարները»:
Մոհամեդ Աիտ-Արաբի ձեւակերպմամբ, «Խորհրդանշական է, որ Ֆրանկոֆոնիայի 17-րդ գագաթնաժողովը տեղի ունեցավ Հայաստանում՝ ապրիլյան դեպքերից հետո, որովհետեւ «Մեծ Արեւելքի» Ֆրանկ մասոնների համար Ֆրանկոֆոնիան նախ եւ առաջ առաջընթաց է, ինքնաիրացում: Հուսով եմ, որ այս գագաթնաժողովը կնպաստի հումանիստական գաղափարների զարգացմանը, ինչը մեր հավատամքն է»:
Ֆրանսիայի «Մեծ Արեւելք» մասոնական օթյակի ներկայացուցիչների հետ զրույցի այլ մանրամասներ՝ մասնավորապես հայաստանյան «Արարատի որդիներ» օթյակի մասին՝ հաջորդիվ:
Լուսանկարում՝ «Մեծ Արեւելք» մասոնական օթյակի մեծ վարպետի տեղակալ Մոհամեդ Աիտ-Արաբը(ձախից), Էղվե Զաքարիանը, Պիեր Ֆիորին եւ Դիմիտրի Արսենակիսը:
Գոհար ՀԱԿՈԲՅԱՆ
