Եվրոպայի խորհրդի խորհրդարանական վեհաժողովի (ԵԽԽՎ) աշնանային նստաշրջանի լիագումար նիստի ընթացքում ԵԽ գլխավոր քարտուղար Թորբյորն Յագլանդի հետ հարցուպատասխանի ընթացքում ԵԽԽՎ-ում ադրբեջանական պատվիրակության անդամները շատ ակտիվ էին:
Նրանք բարձրացրին մի շարք հարցեր: Օրինակ՝ ԵԽ գլխավոր քարտուղարից հետաքրքրվեցին՝ ի՞նչ է լինելու հայկական կողմում պահվող Շահբազ Գուլիեւի եւ Դիլհամ Ասկերովի վերադարձի հարցը:
Հիշեցնենք՝ Շահբազ Գուլիեւը եւ Դիլհամ Ասկերովը գտնվում են Արցախում: 2014թ-ին Դիլհամ Ասկերովը դատապարտվել է ցմահ ազատազրկման, իսկ Շահբազ Գուլիևը՝ 22 տարվա ազատազրկման: Նրանք մեղադրվում են լրտեսության, Լեռնային Ղարաբաղի պետական սահմանը հատելու, ապօրինի ռազմամթերք կրելու, մարդ առևանգելու և սպանելու համար։
ԵԽ գլխավոր քարտուղարը հարցին հստակ պատասխան չտվեց: Թորբյորն Յագլանդը վստահեցրեց. «Այդ հարցով կշարունակեմ ուսումնասիրություն կատարել»:
Ադրբեջանական պատվիրակության անդամներին հետաքրքրում էր նաև, թե երբ հնարավոր կլինի ՌԴ-ի՝ ԵԽԽՎ վերադարձը: Այս կապակցությամբ ԵԽ գլխավոր քարտուղարը պարզաբանեց. «Ռուսաստանի հետ կապված հարցի քննարկումը կշարունակենք ԵԽ նախարարների կոմիտեում»:
Տաթև ՀԱՐՈՒԹՅՈՒՆՅԱՆ
