Հոկտեմբերի 11-ին Երևանում մեկնարկեց Ֆրանկոֆոնիայի միջազգային կազմակերպության 17-րդ գագաթնաժողովը: Հանդիպման թեման է «Ապրել միասին՝ հարգելով համերաշխությունը, մարդասիրական արժեքներն ու բազմազանությունը՝ իբրև խաղաղության և բարօրության հիմք ֆրանկոֆոն տարածաշրջանում», և դրան մասնակցում են 38 երկրների ղեկավարներ:
Գագաթնաժողովի ընթացքում ելույթով հանդես եկավ Ֆրանսիայի նախագահ Էմանուել Մակրոնը, որը կարևորեց ֆրանսերեն լեզվի տարածումը:
Նա նշեց, որ շուտով 700 մլն մարդ կխոսի ֆրանսերեն, և ֆրանսերենը այսօր հանդիսանում է երկրորդ ամենաշատ ուսուցանված լեզուն անգլերենից հետո:
«Մենք ստեղծագործ լեզու ենք. մեր երկխոսությունները միջազգային շրջանակներում անգլերենով են անցնում, անգլերենը դարձել է կիրառական լեզու, սակայն ֆրանսերենն էլ կարող է ունենալ նույն աստիճանը: Մենք պետք է հիշենք, որ ֆրանսերենը ստեղծագործ լեզու է»:
Նա նաև կարևորեց ֆրանսերեն լեզվի ակտիվ կիրառումը ինտերնետում և նշեց, որ ֆրանսերենը չի կարող գոյություն ունենալ, եթե ամփոփված լինի մեկ մայրցամաքով:
Մակրոնը առաջարկեց ստեղծագործող հեղինակների համաժողով հրավիրել և ստեղծել մի շարք նոր բառարաններ:
Էմանուել Մակրոնը խոսեց նաեւ ֆրանսահայ մեծանուն երգիչ, երգահան Շառլ Ազնավուրի մասին:
«Հայաստանի համար Ֆրանսիան և ֆրանկոֆոնիան խորհրդանշվում էին մի ձայնով, երգի հսկա տաղանդով, որը երգում էր մեր երջանկությունը, մեր դժբախտությունները, մեր թեթև մոտեցումները կյանքի, մի հատուկ թախիծով, որը յուրահատուկ է պանդխտության մեջ ապրող մարդկանց համար»:
Նրա խոսքով` Ազնավուրը երգում և պահպանում էր հայկականությունը, կազմակերպում օգնության գործընթացներ Ցեղասպանության ժամանակ և խրախուսում էր քաջությունը:
Պատրաստեց Սոնա ԳԵՎՈՐԳՅԱՆԸ
