Եվրոպայի խորհրդի խորհրդարանական վեհաժողովի (ԵԽԽՎ) աշնանային նստաշրջանի լիագումար նիստի ընթացքում երեկ վեհաժողովը քննարկեց շվեդ պատվիրակ Ջոնաս Գունարսոնի «Անձնական և ընտանեկան կյանք. հավասարություն անկախ սեռական պատկանելության» զեկույցը:
Զեկույցում ամրագրված է. «Անհրաժեշտ է իրավական համակարգ, որպեսզի այն ճանաչի իրականությունը, միասեռ ամուսնությունները և ծիածան ընտանիքները, որոնք գոյություն ունեն Եվրոպայի տարածքում: Նրանք ունեն նույն կարիքները, ինչ բոլոր մյուս ընտանիքները»:
Զեկույցում կոչ է արվում բոլոր անդամ երկրներին իրենց օրենսդրությունը համապատասխանեցնել ՄԻԵԴ նախադեպային իրավունքին՝ միասեռ ընտանիքների ճանաչման և պաշտպանության համար, որպեսզի նրանք ունենան նույն իրավունքները կապված առողջապահության և այլ ոլորտների հետ: Ըստ զեկույցի՝ միասեռ զուգընկերները պետք է իրավունք ունենան քաղաքացիության, սեփականության, առողջության, ժառանգության և ընտանիք կազմելու:
Համաձայն փաստաթղթի՝ ծննդյան վկայականները պետք է ամրագրեն տրանսգենդեր ծնողների հստակ սեռը, ծնողները պետք է ունեն ծնողական իրավունք ու հարաբերություններ իրենց երեխաների հետ առանց խտրականության: Զեկույցով վեհաժողովը կոչ է անում. «Կոչ ենք անում ընդունել և հարգել մեր հասարակություններում ծիածան ընտանիքներին»:
Նշենք, որ զեկույցը ընդունվեց վեհաժողովի կողմից:
Տաթև ՀԱՐՈՒԹՅՈՒՆՅԱՆ
