Եվրոպայի խորհրդի խորհրդարանական վեհաժողովի (ԵԽԽՎ) աշնանային նստաշրջանի լիագումար նիստի ընթացքում ձայների 39 «կողմ» և 7 «դեմ» հարաբերակցությամբ ընդունվեց գերմանացի պատվիրակ Ֆրանկ Շվաբեի (լուսանկարում) հեղինակած «Եվրոպայի խորհրդի եւ ՄԱԿ-ի մարդու իրավունքների մոնիթորինգային մարմինների կողմից անդամ երկրներ, այդ թվում՝ «գորշ գոտիներ» անսահմանափակ հասանելիության վերաբերյալ» բանաձեւը։
Այն վերաբերում է չճանաչված պետություններում կամ, այսպես կոչված, «գորշ գոտիներում» մարդու իրավունքների մշտադիտարկմանը:
Այս բանաձևով, ըստ էության, ամրագրվում է, Արցախի իշխանությունների պատրաստակամությունը համագործակցել ԵԽ-ի և ՄԱԿ-ի համապատասխան մարմինների հետ` մշտադիտարկման առարկա դարձնելու մարդու իրավունքների իրավիճակն Արցախում:
Զեկույցում ամրագրված է. «Նախարարների կոմիտեն պետք է հրատապ քննարկումներ անցկացնի, երբ Եվրախորհրդի մարդու իրավունքների մոնիտորինգի մարմնին մերժվում է անդամ պետության տարածք մուտք գործել: Այն պետք է հաշվի առնի՝ ԵԽ-ում անդամ պետությունները համաձայնության են եկել մարդու իրավունքների մոնիտորինգային մարմինների կողմից այցելություններ կատարելու հանգամանքներում, որտեղ կա հիմք `հավաստիանալու, որ մարդու հիմնարար իրավունքների եւ արժանապատվության լուրջ խախտումներ կան»:
Բանաձևում մտահոգություն կա, որ պետությունները չեն համագործակցում մարդու իրավունքների միջազգային մոնիտորինգային մեխանիզմների հետ ու կոչ արվում լիարժեք համագործակցության. «Պետք է վերանայվի Եվրոպայի խորհրդի եւ ՄԱԿ-ի մարդու իրավունքների մոնիտորինգի մեխանիզմների միջեւ համագործակցության վիճակը՝ համակարգման եւ առավելագույնս ներդաշնակեցնելու նպատակով»:
ԵԽԽՎ պատվիրակների մեծամասնությունն իրենց ելույթներում կողմ արտահայտվեցին Սակայն միայն ադրբեջանական ողջ պատվիրակությունը և մեկ թուրք պատվիրակ դեմ քվեարկեց զեկույցին:
Այս համատեքստում ԵԽԽՎ ադրբեջանական պատվիրակության անդամ Սևինջ Ֆաթալիևան իր ելույթում անդրադարձավ ՀՀ վարչապետ Նիկոլ Փաշինյանի տիկնոջ՝ Աննա Հակոբյանի և ռուս հասարակական-քաղաքական կին գործիչների՝ Արցախ այցին ու այն համարեց սադրանք. «Այս կերպ չի կարող խաղաղություն հաստատվել, սա սադրանք է»:
Տաթև ՀԱՐՈՒԹՅՈՒՆՅԱՆ
