Արամի եւ Բուզանդի փողոցների աջ ու ձախ հատվածներում` այգու հարեւանությամբ, բուռն շինարարություն է իրականացվում: Շինարարական աղբն էլ ոչ թե սահմանված վայր է տեղափոխվում, այլ ուղիղ «Սանիթեքի» աղբաման: Շինարարական աղբ այլ փողոցներում էլ որքան ուզես՝ կա:
Մոտ երկու ամիս առաջ Վարչական իրավախախտումների մասին օրենքում նոր փոփոխություններ կատարվեցին, ըստ որի՝ մինչեւ 1 խմ ծավալով շինաղբ թափողը կտուգանվի 20-30 հազար դրամի չափով, իսկ իրավաբանական անձի դեպքում տուգանքը կկազմի 60-80 հազար դրամ: 1-ից ավելի խմ ծավալի դեպքում էլ ֆիզիկական անձի նկատմամբ տուգանքը կկազմի 50-80 հազար դրամ, իրավաբանական անձի նկատմամբ՝ 200-300 հազար դրամի չափով: Սակայն օրենքը կա, տուգանողը` ոչ:
Նախկին վարչապետ Կարեն Կարապետյանը վարչական շրջաններին առաջարկեց սանիտարական տեսուչների ինստիտուտը ներդնել, որոնք կիրականացնեին վերահսկողի եւ տուգանողի գործառույթները, տուգանքներից գոյացած գումարներից էլ աշխատավարձ կստանային: Սակայն սանիտարական տեսուչներն այդպես էլ իրականություն չդարձան: Վարչական շրջանների աշխատակիցներն էլ դժվար թե «հետաքննություն» անեն` պարզելու, թե որ շինարարական աղբն ում է պատկանում:
Լուսանկարը` ԼՈՒՍԻՆԵ ԲՈՒԴԱՂՅԱՆԻ
«Առավոտ»
10.10.2018
