«Մեկ շաբաթ առաջ ՀՀԿ խմբակցությունը ընդունեց հայտարարություն վերջին իրադարձությունների հետ կապված: Այդ հայտարարությունը քննարկվում էր եւ իմ գործընկերներից, որոնք ստորագրել են դեկտեմբերին խորհրդարանական ընտրություններ անցկացնելու դիրքորոշման տակ, որեւէ մեկը չէր արտահայտել այլ կարծիք: Այնուհանդերձ, իմ ունեցած տեղեկություններով՝ մի շարք պատգամավորների հանդեպ եղել են ճնշումներ, գործադրվել է պետական ռեպրեսիվ ապարատը իր բոլոր հնարավորություններով: Նաեւ փորձում էին գտնել որոշ պատգամավորների վրա արտերկրից ներազդելու հնարավորություններ», այսօր խորհրդարանում լրագրողների հետ զրույցում նման հայտարարություն արեց ԱԺ արտաքին հարաբերությունների հանձնաժողովի նախագահ, ՀՀԿ փոխնախագահ Արմեն Աշոտյանը՝ անդրադառնալով դեկտեմբերին արտահերթ ընտրություններ անցկացնելու նախաձեռնության տակ ստորագրած 14 պատգամավորների քայլին, որոնցից 9-ը ՀՀԿ խմբակցության անդամներ են:
Արմեն Աշոտյանը չբացառեց, որ որոշ պատգամավորներ նաեւ ինքնակամ են միացել այդ նախաձեռնությանը:
Լրագրողները փորձեցին առավել հստակ եւ փաստարկված հայտարարություններ ստանալ Արմեն Աշոտյանից, թե ինչ ճնշումների մասին է խոսքը: «Ես ասացի այնքան, ինչքան ասացի: Իմ ունեցած տեղեկություններով այդ ճնշումները եղել են, բայց ինչպես ասացի, չեմ բացառում, որ եղել են ինքնակամ դարձի եկածներ՝ ինչպես այս օրերին սիրում է ներկայացնել ընդդիմադիր մամուլը: Բոլոր դեպքերում ակնհայտ է, որ Նիկոլ Փաշինյանը փորձում է ինդուլգենցիաներ պարտադրել, ֆեյսբուքյան ստատուսներում գրում է ով է ճիշտ, ով է սխալ, ում պետք է քաջալերել, ում չպետք է քաջալերել: Այդ գործընթացն, իհարկե, միջնադար է հիշեցնում, երբ կաթոլիկ եկեղեցու ղեկավարները փորձում էին մեղքերի թողության փաստաթղթեր թողարկել, այդ թվում՝ նաեւ ապագա մեղքերի: Չեմ կարծում, որ Նիկոլ Փաշինյանն այն անձն է, որը պետք է ներում շնորհի կամ ինդուլգենցիաների բաժանմամբ զբաղվի: Ես այդպիսի մեկ անձի եմ ճանաչում, նրա անունը Նիկոլ Փաշինյան չէ՝ Հիսուս Նազովրեցի է»,- ասաց Արմեն Աշոտյանը:
ԲՀԿ-ի հուշագիր ստորագրելու քայլը Արմեն Աշոտյանը չի մեկնաբանում, ասաց՝ դա իրենց իրավունքն է եւ ՀՀԿ-ին դրան հարգանքով են վերաբերվում: Նույն կերպ կվերաբերվեն նաեւ, եթե ՀՅԴ-ն նման դիրքորոշման հանգի:
Այլ մանրամասները՝ տեսանյութում:
Նելլի ԳՐԻԳՈՐՅԱՆ
