Այսօր վարչապետին կից Ընտրական բարեփոխումների հանձնաժողովը կառավարությունում Ընտրական նոր օրենսգրքի նախագծի հետ կապված քննարկում էր կազմակերպել:
Հանձնաժողովի քարտուղար Դանիել Իոաննիսյանը ներկայացրեց հայեցակարգը, ասաց, որ անցողիկ շեմը կուսակցությունների եւ դաշինքների համար իջել է, Գյումրիի, Վանաձորի եւ Երեւանի համար այն իջեցվել է 2-ական տոկոսով, դարձել է դաշինքների համար 6 տոկոս, կուսակցությունների համար 4: Անվճար եթերաժամանակը հեռոստագովազդի ավելացվել է, ԶՈՒ ներկայացուցիչների համար նախընտրական ծրագրերին ծանոթանալու, հեռուստաբանավեճերը դիտելու հնարավորություններն են մեծացվել, փոխվել են այն նորմերը, որոնք երաշխավորում են, որ ընտրությունները չեն կեղծվելու, օրինակ, լինելու է պատահական սկզբունքով վերահաշվարկ. «Որեւիցե մեկը վստահություն չի ունենա, որ ընտրատեղամասում փակված պարկը չի բացվելու»,- ասաց Իոաննիսյանը:
Նա հավելեց, որ խստացվել է ընտրությունների արդյունքները կեղծելու համար քրեական պատասխանատվությունը: Նախկինում 5 տարի ազատազրկում էր նախատեսվում, հիմա՝ 8 տարի:
Դանիել Իոաննիսյանը տեղեկացրեց, որ ուրբաթ օրը «Ընտրական օրենսգրքի» նախագծի անգլերեն տարբերակը ուղարկվել է Վենետիկի հանձնաժողով, ԵԱՀԿ/ԺՀՄԻԳ եւ կառավարությունը սպասում է իրենց փորձագիտական եզրակացությանը: Իոաննիսյանն ընդգծեց, որ նախագծում տեղ են գտել հենց Վենետիկի հանձնաժողովի եւ ԵԱՀԿ/ԺՀՄԻԳ-ի շատ առաջարկներ: Նա ասաց, որ հաջորդ խորհրդարանը եւս անելիքներ ունի ԸՕ-ի հետ կապված, ակնկալվում է, որ այդ խորհրդարանն ավելի բարձր լեգիտիմություն կունենա՝ այդ հարցերին լուծում տալու համար:
Հռիփսիմե ՋԵԲԵՋՅԱՆ
