Եվրոպայի խորհրդի խորհրդարանական վեհաժողովի (ԵԽԽՎ) աշնանային նստաշրջանի լիագումար նիստի ընթացքում ԵԽԽՎ-ում ադրբեջանական պատվիրակության անդամ Ռաֆայել Հուսեյնովը, հիշեցնելով, որ վեց ամսից տոնելու են ԵԽ-ի 70-ամյակը և նախաձեռնություն կա, որպեսզի ԵԽ-ի կայքում տեղադրվեն բոլոր անդամ երկրների 216 նախագահների ելույթները, առաջարկեց, որպեսզի ԵԽ-ի կայքում չտեղադրվեն ՀՀ երկու նախագահների ելույթները ու մանրամասնեց. «Այդ 216 նախագահների շարքում, որոնք ելույթ են ունեցել այս վեհաժողովում, ՀՀ երկու նախկին նախագահներն են: Մենք վերջին 18 տարիների ընթացքում մշտապես բարձրաձայնել ենք օկուպանտ Հայաստանում տիրող հանցավոր ռեժիմի մասին՝ բերելով կոնկրետ փաստեր: Միշտ կարծիք ենք հայտնել, որ այս երկրում կայացած նախագահական ընտրությունները կազմակերպվել են ոչ արդար, այլ հանցավոր ռեժիմով, բայց ի հակադրություն մեր բերած մտահոգությունների ու փաստերի, ԵԽԽՎ առաջընթացի զեկույցը միշտ հակառակ պատկերն է արտացոլել և լեգիտիմացրել այդ ընտրությունները»:
Ռաֆայել Հուսեյնովը հայտարարեց՝ այժմ Հայաստանում են հենց համարում, որ նախկին երկու նախագահները հանցագործներ են, ու հարց բարձրացրեց՝ այսքանից հետո ԵԽ-ն ցանկանում է նրանց ելույթները տեղադրել իր կայքո՞ւմ:
Այս ելույթին հաջորդեց ԵԽԽՎ-ում հայկական պատվիրակության անդամ Էդմոն Մարուքյանի խոսքը: Նա չցանկացավ արձագանքել ադրբեջանցի գործընկերոջ ելույթին, ուղղակի հորդորեց. «Խնդրում եմ կռիվ տվեք Ձեր երկրի և Ձեր երկրում ժողովրդավարության համար և ստեր մի տարածեք այս հարգանք վայելով կառույցում»:
ԵԽԽՎ ամբիոնից Էդմոն Մարուքյանը հայտարարեց՝ այլևս անհետաձգելի խնդիր է դարձել ՀՀ-ում արտահերթ խորհրդարանական ընտրությունների անցկացումը, որը պետք է կազմակերպվի ընտրական օրենսդրության տառին ու ոգուն համապատասխան՝ ամբողջ գործընթացների հիմքում ունենալով մարդու իրավունքները, իրավունքի գերակայությունը և ժողովրդավարության հիմնարար սկզբունքները։
Էդմոն Մարուքյանը կոչ արեց վեհաժողովին իր հետևողական աջակցությունը ցուցաբերել Հայաստանի նոր իշխանություններին կոռուպցիայի դեմ անխոնջ պայքարում, համակարգային բարեփոխումների իրականացման և արտահերթ խորհրդարանական ընտրությունների կազմակերպման գործում՝ հաշվի առնելով հատկապես այն հանգամանքը, որ Եվրոպայի Խորհուրդը բոլորիս՝ այդ թվում նաև Հայաստանի կազմակերպությունն է և չի կարող այս պարագայում ստանձնել սոսկ դիտորդի կարգավիճակ, այլ պետք է ջանք չխնայի աջակցելու ընթացող ժողովրդավարական պրոցեսներին, քանի որ Հայաստանում իրականացվող փոփոխությունները միտված են օրինակելի ժողովրդավարության հաստատմանը։
Տաթև ՀԱՐՈՒԹՅՈՒՆՅԱՆ
