Բնապահպանության և ընդերքի տեսչական մարմնի աշխատակիցները ս.թ․ սեպտեմբերի 3-ին, 6-ին և 16-ին օրենքով սահմանված կարգով «Արմօյլ» ՓԲԸ-ում ստուգում իրականացնելու նպատակով այցելել են «Արմօյլ» ՓԲԸ, սակայն թվարկված բոլոր դեպքերում ընկերության ներկայացուցիչների կողմից խոչընդոտվել է ստուգման ընթացքը, չեն կատարվել ստուգումն իրականացնող անձանց օրինական պահանջները, ինչի հետևանքով ԲԸՏՄ-ի կողմից հարուցված վարչական իրավախախտման վերաբերյալ վարույթի արդյունքում ընկերությունը ս.թ․ սեպտեմբերի 24-ին ենթարկվել է վարչական տույժի՝ 250.000 ՀՀ դրամ գումարի չափով։
ԲԸՏՄ ղեկավարի հանձնարականի հիման վրա ս.թ․ հոկտեմբերի 8-ին ստուգում անցկացնելու նպատակով ստուգող խումբը կրկին այցելել է «Արմօյլ» ՓԲԸ, սակայն ընկերության տնօրեն Ալֆրեդ Աբեդիի կողմից հերթական անգամ խոչընդոտվել է ստուգման անցկացումը։ Ստուգում իրականացնելուն «Արմօյլ» ՓԲԸ-ի կողմից պարբերաբար խոչընդոտելու կապակցությամբ Բնապահպանության և ընդերքի տեսչական մարմինը դիմել է ՀՀ ոստիկանություն։
Բնապահպանության և ընդերքի տեսչական մարմնի հաղորդագրություն
ՀԱՂՈՐԴՈՒՄ ԼՐԱՏՎԱՄԻՋՈՑՆԵՐԻՆ
Սույնով հայտնում ենք, որ Բնապահպանության և ընդերքի տեսչական մարմնի հայտարարություններն առ այն, թե իբր «Արմօյլ» ՓԲԸ-ն խոչընդոտել է ստուգման ընթացքը, չեն համապատասխանում իրականությանը և տեսչական մարմնի ղեկավարի թերի մեկնաբանության արդյունք են:
«Արմօյլ» ՓԲԸ-ն թույլ չի տվել և թույլ չի տալու միայն այն անձանց մուտքը, ովքեր չունեն ստուգում իրականցնելու պատշաճ լիազորություններ, իսկ նրանց մոտ առկա վկայականները տեսչական մարմնի ղեկավարի կողմից տրվել են պաշտոնեական լիազորությունների չարաշահման և/կամ պաշտոնեական կեղծիքի միջոցով, որի կապակցությամբ Ընկերությունը դեռ 17.09.2018թ.-ին հանցագործության մասին հաղորդում է ներկայացրել իրավապահ մարմիններին:
Իսկ Ընկերության տնօրենին 250,000 ՀՀ դրամ վարչական տույժ նշանակելու փաստը պայմանավորված է բացառապես տեսչական մարմնի ղեկավարի անձնական շահի հետապմդմամբ և իր անսխալականությունն ապացուցելու նկրտումներով՝ ամենայն հավանականությամբ հաղորդմանը ծանոթանալուց հետո: Այդ տույժն ակնհայտ անհիմն է և մեր կողմից բողոքարկվելու է Արթուր Գրիգորյանի վերադասին, իսկ արդյունքի չհասնելու դեպքում՝ վարչական դատարան:
Ալֆրեդ Աբեդի
«Արմօյլ» ՓԲԸ գլխավոր տնօրեն