RFI-ն հոկտեմբերի 4-ին անդրադարձել է Հայաստանում հոկտեմբերի 2-ին ծավալված իրադարձություններին: «Քաղաքական ճգնաժամը Հայաստանում շարունակվում է։ Երեկ Հանրապետական կուսակցության պատգամավորների` նախկին իշխող կուսակցության, առաջարկած փոփոխություններն առաջացրել են վարչապետ Նիկոլ Փաշինյանի զայրույթը։ Արդեն երկու օր է՝ վերսկսվել են բողոքի ցույցերը մինչև տարվա վերջ ընտրություններ կազմակերպելու պահանջով։ Խնդիրները դեռևս առկա են իշխանությունների և խորհրդարանի միջև, որն իշխանությանը մեղադրում է արտահերթ ընտրությունները ուժով պարտադրելու համար»,- նշում է ֆրանսիական ռադիոկայանի Երեւանում գտնվող հատուկ թղթակից Դանիել Վալոն:
Դանիել Վալոն հարցազրույց է անցկացրել Հանրապետական կուսակցության փոխնախագահ Արմեն Աշոտյանի հետ, որն ասել է. «Արտահերթ ընտրությունների անցկացման որոշումը չպետք է կայացնի մեկ անհատը, եթե անգամ խոսքը վարչապետի մասին է։ Պետք է այս գործընթացում հաշվի առնել կուսակցությունների կարծիքը։ Շատ կարևոր է եվրոպական չափանիշների համապատասխան բոլոր կողմերը ներառող երկխոսություն ունենալ։ Այսինքն` մենք չենք ուզում շտապել։ Խորհրդարանի մեծամասնությանը դուր չի գալիս, թե ինչպես է վարչապետը պարտադրում իր սեփական քաղաքական նպատակներն ու ցանկությունները։ Մենք սպասում ենք, որ նա իրեն կդրսևորի որպես պետական գործիչ, ոչ թե որպես հասարակական կարծիքի առաջատար։ Քանզի ցանկացած քաղաքական գործընթաց՝ այդ թվում նաև արտահերթ ընտրությունների կազմակերպումը, պետք է կազմակերպվի օրենքին, սահմանադրությանը և իշխանությունների բաժանման սկզբունքներին համապատասխան»:
