Վահրամ Բաղդասարյանը պատմում է, թե «Մարիոթ»-ում ինչ են խոստացել Փաշինյանին
Արդեն քանի օր է՝ վարչապետ Նիկոլ Փաշինյանը հանդիպումներ է սկսել խորհրդարանական ուժերի հետ՝ արտահերթ ընտրությունների հետ կապված, իսկ նախօրեին հայտարարեց, որ դեկտեմբերին լինելու են ընտրություններ: Առայժմ այդ բանակցությունները որեւէ արդյունք չեն տվել, քննարկումները շարունակվում են:
«Առավոտի» հարցին՝ եթե տեսականորեն բանակցութjունները չեն ստացվում, որեւէ համաձայնության չեն գալիս, ի՞նչ է լինելու դրանից հետո, «Ելք» խմբակցության պատգամավոր Էդմոն Մարուքյանը պատասխանեց. «Վարչապետն ինքը իր ծրագրով գնալու է, ուզում է՝ ստացվի, ուզում է՝ չստացվի»: Հարցին՝ ասենք, հրաժարական տվեց, այդտեղ վտանգ Դուք չե՞ք տեսնում, Մարուքյանը պատասխանեց. «Չէ, ես վտանգ չեմ տեսնում, ի՞նչ է լինելու, ո՞նց են այլ թեկնածու առաջադրելու, իմաստը ո՞րն է: Այսինքն՝ սաղ ժողովուրդը եթե ուրիշ բան է մտածում, իրենք ուրիշ մարդո՞ւ են առաջադրում, հո կամիկաձե՞ չեն»:
Մեր հարցին՝ իրենք ժողովրդի այդ հոսանքի դեմ գնալու խնդի՞ր ունեն, որ մտածում եք՝ ժողովրդի դեմ չեն գնա, չէ՞ որ ՀՀԿ-ին քննադատում էին, որ միշտ էլ ժողովրդի դեմ է գնացել ու ժողովրդի դեմ որոշումներ կայացրել, Մարուքյանը պատասխանեց. «Միշտ, երբ եղել է, որ ժողովրդի դեմ են գնացել, այսպիսի իրավիճակ չի եղել: Այդ «միշտ»-ի ժամանակ մենք 7,8 տոկոս ձայն ենք տարել, այդպիսին է եղել այդ «միշտ»-ը, հիմա ուրիշ իրավիճակ է: Իրողություններն այնպիսին են, որ չի լինի, երբ որ դու տեսնում ես, որ ամբողջ հասարակությունը մի ձեւով է մտածում, դու ո՞նց այլ ձեւով կմտածես, դու էլի կարող ես այլ ձեւով մտածել, բայց գործել, դեմ գնալ այդ իրավիճակին, դա, կարծում եմ, իմաստուն չի լինի»:
Դիտարկմանը՝ իրենք կորցնելու բան չունեն, ինչ կորցնելու էին՝ արդեն կորցրել են, հիմա չե՞ն փորձելու ստանալ գոնե ինչ-որ բան, Էդմոն Մարուքյանը չհամաձայնեց. «Ես չեմ կարծում, որ կորցնելու բան չունեն, մենք բոլորս ունենք պետություն, պետք է ամեն ինչ անենք, որ մեր պետությունը լինի կայուն, խաղաղ եւ զարգանա»:
«Առավոտը» նաեւ ՀՀԿ փոխնախագահ Արմեն Աշոտյանին հարցրեց՝ հակահեղափոխություն կարո՞ղ է լինել, թե՞ ոչ, դուք որեւէ շանս ունե՞ք, եթե համաձայնության չգաք արտահերթ ընտրությունների հետ կապված՝ նա պատասխանեց. «Այդ բառը՝ հակահեղափոխություն, մերժելի է եղել ինձ համար ի սկզբանե: Նման տերմին շրջանառելն ի սկզբանե դիտարկել եմ որպես տեղեկատվական քարոզչական մանիպուլյացիա, ես չեմ ընդունում Հայաստանում տեղի ունեցածը՝ որպես դասական հեղափոխություն, իշխանափոխություն՝ այո, հեղափոխություն՝ ոչ, հետեւաբար հակահեղափոխություն լինել չէր կարող, հակաիշխանափոխություն՝ նույնպես, որովհետեւ իշխանափոխություն տեղի է ունեցել: Մնացած ամեն ինչը քարոզչական մոբիլիզացիոն տեխնոլոգիաներ են, որոնց օրինակները մարդկության պատմության մեջ Հին Հռոմից մինչեւ Սովետական Միություն շատ կա»:
Մեր հարցին՝ վարչապետը եթե իր ասածն արեց՝ դեկտեմբերին խորհրդարանական արտահերթ ընտրություն, դուք ի՞նչ շանս ունեք, Աշոտյանը պատասխանեց. «Լավ չի, եթե երկրի մասին խոսելիս ասում ենք՝ վարչապետն իր ասածն արեց: Այս ձեւակերպումը տեղ չունի մեր Սահմանադրության մեջ, այս ձեւակերպումը տեղ չունի պետականաշինության մեջ: Այս ձեւակերպումը, այո, այսօր վարչապետի շուրջ ձեւավորված դրական փսիխոէմոցիոնալ դաշտի ու քաղաքական վստահության արտահայտում է, բայց էմոցիաները կանցնեն, Սահմանադրությունը կմնա, հետեւաբար այդ ձեւակերպումն ինձ ավելի շատ հիշեցնում է մաչոիզմի դրսեւորում, որ այս պահին ընդհանրապես տեղին չէ բազմաթիվ պատճառներով: Քաղաքական մաչոիզմը տեղին չէ ընդհանրապես, Սահմանադրությունը տեղին է»:
ՀՀԿ խմբակցության ղեկավար Վահրամ Բաղդասարյանը մեր հարցին՝ եթե Նիկիոլ Փաշինյանի հետ բանակցությունները որեւէ կետի չհանգեն, ՀՀԿ-ականները պլան B ունե՞ն, ի՞նչ պիտի անեք՝ պատասխանեց. «Նախ, պլան B-ի մասին որեւէ մեկը բարձրաձայն չի արտահայտվում: Ավելի շատ մտածում ենք ներքաղաքական իրավիճակի կարգավորման հետ կապված, ոչ թե պլան B-ի մասին: «Դեկտեմբեր եւ վերջ». մենք նման շեշտադրումով որեւէ քննարկում նման տիպի չենք ցանկանում կազմակերպել: Մենք պատրաստ ենք արտահերթ ընտրությունների տրամաբանական ժամանակներում: Դա կլինի «Ընտրական օրենսգրքի» քննարկումից հետո, կլինի ճանապարհային քարտեզ, մեր տրամաբանական մոտեցումը մայիսն էր: Կարծես թե բանակցությունները գնում էին այդ ուղղությամբ, սակայն ինչ-ինչ պատճառներով, ես չհասկացա տրամաբանությունը, հանկարծ շրջվեց դեկտեմբեր: Ես չեմ կարծում, որ մենք կգնանք այդ քայլին, որովհետեւ քաղաքական ուժերը պետք է հնարավորություն ունենան ընտրությունների պատրաստվելու: Մենք որեւէ պայմանավորվածություն չենք խախտել: Այս օրենքը, (նկատի ունի ԱԺ կանոնակարգ օրենքը,- Հ. Ջ. ), որը մատնացույց են անում, դա պարզապես պատրվակ է: 4 պատգամավոր երեկ ԱԺ չկարողացան մուտք գործել, հայհոյանքներ տարբեր տիպի, այս օրենքը դրան էր միտված, որ պատգամավորների ազատ տեղաշարժը, նրանց նկատմամբ բռնությունները կարողանա կանխարգելել: Այդ օրենքի միտումը եղել է միայն դա: Մենք «Մարիոթ» հյուրանոցում բանակցությունների ժամանակ հստակ ասացինք, որ պատրաստ ենք ձեռք ձեռքի բռնած, հայտարարություններով, հուշագիր ստորագրելով՝ մայիս ամսին գնալ ընտրությունների եւ ապահովել մինչեւ այդ ԱԺ բնականոն աշխատանքը: Դա պարոն Փաշինյանը նույնպես կվկայի: Հաջորդ առավոտյան նորից զանգ եղավ պարոն Փաշինյանի կողմից, բա՝ այդ օրենքը խնդրում ենք չքվեարկեք, այսօր նորից հանդիպենք: Մենք լսեցինք, հարգեցինք իր խնդրանքը, օրենքը չքվեարկեցինք առավոտյան, իսկ երեկոյան նորից հանդիպում ունեցանք, բայց արդեն այդ հանդիպումը բանակցություն չէր, ինքը պարզապես եկավ իրազեկելու, որ ես ցանկանում եմ տեղյակ պահել, որ մեր պայմանավորվածությունների ժամանակացույցի հետ ես համաձայն չեմ, մենք գնում ենք դեկտեմբերին, եւ դա իմ միաձայն որոշումն է»:
Հարցին՝ եթե ական չկար այդ օրենքի տակ, ինչո՞ւ դուք հետքայլ չկատարեցիք, այլ այսպես գիշերային քվեարկությամբ այն անցկացրեցիք, Վահրամ Բաղդասարյանը պատասխանեց. «Մենք արդեն հետքայլ կատարեցինք, չքվեարկեցինք, որ գանք բանակցելու, բայց երբ եկավ ու ասաց՝ ոչ, դեկտեմբեր, ու բանակցելու բան չկա, այլեւս այլ քայլ չկար անելու, քան այդ օրենքը անցկացնել: Մասնագետներին կարող եք հարցնել, դա անշառ օրենք էր»:
Դիտարկմանը՝ Էդմոն Մարուքյանն ասաց, որ վարչապետն արդեն հրապարակել է իր ծրագիրը, եւ ՀՀԿ-ն որեւէ բան չի կարող անել ժողովրդի դեմ, Վահրամ Բաղդասարյանն արձագանքեց. «Դուք ցանկանում եք, որ ես ասեմ՝ ոչ, մենք կարող ենք, լարում մտցնենք արհեստական: Համենայնդեպս, երեք քաղաքական ուժերի հետ չեն ցանկանում հաշվի նստել եւ բանակցություններ շարունակել, ասում են՝ այսպես է եւ վերջ: Դե եթե ինքը միայնակ կատարելու է այդ քայլերը, թող կատարի եւ ձեւավորի ԱԺ, հետագայում կտեսնենք այդ ԱԺ-ի որակը, եթե պետք է ձեւավորի»:
Վերջում պարոն Բաղդասարյանին հարցրինք՝ հակահեղափոխությունը շանս ունի՞, Վահրամ Բաղդասարյանը պատասխանեց. «Մերժե՛ք այդ բառերը, խնդրում եմ»: Դիտարկմանը, որ վարչապետն ասաց՝ ով քվեարկել է այդ օրինագծին, հակահեղափոխական է, Բաղդասարյանը արձագանքեց. «Այսինքն՝ ի՞նքը պետք է որոշի՝ ես հակահեղափոխական եմ, թե հեղափոխական»: Ճշտեցինք՝ դուք ձեզ չե՞ք համարում հակահեղափոխական, Վահրամ Բաղդասարյանը պատասխանեց. «Բացարձակապե՛ս, դա վիրավորական է»:
ՀՌԻՓՍԻՄԵ ՋԵԲԵՋՅԱՆ
«Առավոտ»
04.10.2018
