Ըստ իրավաբան Արտյոմ Գեղամյանի՝ թավշյա հեղափոխությունից հետո Հայաստանում անցումային արդարադատության մասին քննարկումները սխալ ուղղությամբ են գնացել: «Չտվեցինք անցումային արդարադատության բնորոշումը, հաճախ շփոթեցինք անցումային արդարադատությունը կոնվենցիոնալ արդարադատական մարմինների գործառույթների հետ», -այսօր «Հոդված» ակումբում ասաց Արտյոմ Գեղամյանը:
Նա հիշեցրեց, որ անցումային արդարադատության մասին առաջին անգամ խոսվեց 2018 թվականի ապրիլյան իրադարձություններից հետո, սկզբում այդ քննարկումները չունեին քաղաքական բնույթ, սակայն օգոստոսյան հանրահավաքից հետո վարչապետի կողմից հնչեցվեց անցումային արդարադատություն իրականացնելու գաղափար:
Իրավապաշտպան Արթուր Սաքունցն էլ ասաց, որ դեռ չի օգտագործի անցումային արդարադատություն հասկացությունը, այլ կխոսի անկախությունից հետո առաջացած խնդիրների մասին: Ըստ նրա՝ թավշյա հեղափոխության բուն պատճառը սոցիալական արդարության բացակայությունն էր. «Երբ նախորդ ժամանակահատվածում մշտադիտարկումներ էինք անցկացնում տվել էին այսպիսի գնահատական, որ տիրում է անպատժելիության մթնոլորտ. մարդու իրավունքների խախտումների համար որեւէ մեկը չէր պատժվում: Զանգվածային բնույթ ուներ ընտրությունների ժամանակ ընտրակեղծիքները, դրա արդյունքում իշխանության ձեւավորումը…մենք պետք է ունենանք քաղաքական ու իրավական գնահատական անկախությունից հետո մեր պատմությանը, թե ինչպիսին չպետք է լինի արդարադատությունը, եւ մարդիկ, որոնց իրավունքները խախտվել են, պետությունը պետք է այդ խախտումը ճանաչի, որ ոչ բարեխիղճ կառավարման հետեւանքով է խախտվել ու տրվի նրանց փոխհատուցում, հաջորդ խնդիրը պատասխանատվության հարցն է»:
Իրավապաշտպանի համոզմամբ, երբ մարդու իրավունքների խախտումներին չի տրվում իրավական ու քաղաքական գնահատական, ապա մենք կունենանք այն, ինչ ունեցանք:
Արփինե ՍԻՄՈՆՅԱՆ
