Ինչպես արդեն տեղեկացրել ենք, կառավարությունը մտադիր է Ֆրանկոֆոնիայի գագաթաժողովի օրերը՝ հոկտեմբերի 11-12-ը, հայտարարել ոչ աշխատանքային: Սրա համար անհրաժեշտ է օրենսդրական փոփոխություն, ուստի կառավարության այսօրվա նիստում նախագծով առաջարկվեց վաղը հրավիրել ԱԺ արտահերթ նիստ: Օրենսդրական փոփոխությունը պետք է կատարվի «Տոների և հիշատակների մասին» օրենքում:
Կառավարության նիստում հայտարարվեց, որ այդ միջոցառման օրերին կարիք է լինելու փակել Երևանի գլխավոր փողոցները, ինչն անհարմարություններ ու խցանումներ է ստեղծելու: Զեկուցվեց, որ 40 -ից ավելի երկրների ղեկավարություններ են այդ օրերին լինելու Հայաստանում, դա բացառիկ իրադարձություն է:
Կառավարության նախագծում հիմնավորումն այսպես էր՝ չորս և ավելի երկրների ղեկավարներ են այցելելու Հայաստան եւ նման փոփոխություն կատարելու անհրաժեշտություն է առաջանում: Նիկոլ Փաշինյանը առաջարկեց այլ ձևակերպում՝ «պետության և հանրային կյանքի համար բացառիկ իրադարձության կապակցությամբ» եւ հիմնավորեց. «Այնպես չպետք է լինի, որ եթե վաղը օլիմպիական խաղեր կազմակերպվեն, նորից փոփոխություն անեն, ասենք վեց և ավելի երկրներից 25 մարզիկների այցի դեպքում նման որոշում է ընդունվում, հետո պիտի հաշվենք, թե քանի մարզիկ եկավ, հետո պիտի հաշվենք վեց երկրի ղեկավար է եկել, թե ոչ»:
Որոշ նախարարներ կարծիք հայտնեցին, որ այս առաջարկով կառավարության լիազորությունները մեծանում են: Փաշինյանն արձագանքեց. «Ձեր մեկնաբանությունները աբսուրդ են: Այս խնդիրը եկել ու հասել է վերջին օրերին, ինչի՞ց է այդ մոտեցումը, որ կառավարությունը պետք է օր գտնի, որ տեղափոխի: Ես ասում եմ՝ եկել է օրը, պետք է այնպիսի ձևակերպում, որպեսզի ամեն նոր իրադարձության ժամանակ օրենք չփոփոխվի: Կառավարությունը ժողովրդին ներկայացնող մարմին է, եթե անտրամաբանական բաներ կանի, կդադարի կառավարություն լինել»:
«Չորս և ավելի երկրների ղեկավարների Հայաստան ժամանելը մեզ համար տո՞ն է, թե՞ հիշատակ,- հարցրեց արդարադատության նախարար Արտակ Զեյնալյանը: Վարչապետն ավելի սրամիտ պատասխան տվեց. «Հիշարժան օր է…Էկզամեն դլյա նաս վսեգդա պռազդնիկ»:
Ի վերջո, առաջարկվեց նախագծում ավելացնել հետևյալ ձևակերպումը՝ «Ինչպես նաև բացառիկ նշանակության իրադարձությունների կապակցությամբ»:
Նելլի ԲԱԲԱՅԱՆ
