Այսօր ԱԺ-կառավարություն հարցուպատասխանի ժամանակ «Ելք» խմբակցության պատգամավոր Գեւորգ Գորգիսյանը հարցրեց՝ մոտ 1000 թոշակառու եւ 4000 գործող սպաներ այս պահին սպասում են բնակարաններ ստանալու: Ի՞նչ վիճակում է այս խնդիրը: Նա նաեւ հետաքրքրվեց՝ շատ է 37 տարեկանում զինծառայությունը լքող սպաների թիվը, մենք ի՞նչ պլաններ ունենք այս մարդկանց շահագրգռելու բանակում պահել:
Պաշտպանության նախարար Դավիթ Տոնոյանը պատասխանեց. «Ինչ վերաբերում է բնակարաններին, այս պահին խնդիրը քննարկվում է կառավարությունում, որպեսզի ձեւաչափը կարողանանք գտնել: Այս պահին շինարարություն է ընթանում եւ առաջին հերթին բնակարանները տրվելու են հաշմանդամներին եւ զոհված ազատամարտիկների անօթեւան ընտանիքներին»:
Ինչ վերաբերում է սպաների՝ բանակը լքելուն՝ Գորգիսյանն ասաց, որ նրանք նախընտրում են տաքսի քշել, քան բանակում ծառայել: Տոնոյանը պատասխանեց, որ այս պահին այդ գործընթացը հնարավորինս կասեցված է, զորացրումները չեն իրականացվում պարտադիր անմիջապես տարիքը լրանալուց հետո:
Հռիփսիմե ՋԵԲԵՋՅԱՆ
