Ըստ քաղաքագետ Հովհաննես Իգիթյանի՝ այսօր ԱԺ արտահերթ ընտրությունների մեկ պատճառ կա՝ խորհրդարանը չի համապատասխանում հասարակության պահանջներին:
«Գաղտնիք չէ, որ այս Ազգային ժողովը ձևավորվել է ընտրակաշառքների ադմինիստրատիվ եւ այլ միջոցների ձևով քաղաքական այլ իրավիճակում և այսօր այն խոչընդոտ է Հայաստանի զարգացման համար»,-«Հենարան» ակումբում նման տեսակետ հայտնեց քաղաքագետ Հովհաննես Իգիթյանը:
ԱԺ կանոնակարգ օրենքում փոփոխություններ անելու նախագծին կողմ քվեարկելու 67 պատգամավորի քայլը քաղաքագետը մեկնաբանեց նրանց՝ աշխատանքը չկորցնելու մտավախությամբ. «Երեւի թե մտածում են՝ աշխատատեղ կկորցնեն ու մտավախություն ունեն, որ չեն կարող աշխատել խորհրդարանից դուրս, այլ կերպ չեն պատկերացնում կյանքը»:
Հովհաննես Իգիթյանը լրիվ բնական է համարում ժողովրդի՝ արտահերթ ընտրություններ անցկացնելու պահանջը՝ Նիկոլ Փաշինյանի և իր թիմի:
«Շատ տրամաբանական է, որ այս ընտրությունները պետք է հնարավորինս շուտ լինեն, քանի որ հնարավոր չէ զարգացնել հանրապետությունը. եթե ամենակարևոր իշխանություններից մեկը՝ Ազգային ժողովը չի աշխատում»:
Հարցին՝ եթե արտահերթ ընտրությունները դեկտեմբերին կայանան, քաղաքական բոլոր ուժերը կլինե՞ն հավասար պայմաններում, բանախոսը պատասխանեց, որ քաղաքական ուժերը այսօր չեն ստեղծվել և իհարկե՝ նրանք կլինեն պատրաստ. «Քաղաքական գործիչները ձևավորվում են ժամանակի ընթացքում»:
Արփինե ՍԻՄՈՆՅԱՆ
