Այսօր ՀՀԿ փոխնախագահ Արմեն Աշոտյանը մանրամասներ ներկայացրեց, թե ինչ է կատարվել երեկ՝ «ԱԺ կանոնակարգ» օրենքում փոփոխությունների աղմկահարույց նախագծի ընդունման հետ կապված: Երեկ ԱԺ նախագահ Արա Բաբլոյանն էլ հայտարարեց, որ այդ նախագծի քվեարկությունը պետք է լիներ կեսօրին, սակայն հայտարարեց, որ տեխնիկական պատճառներով հետաձգվում է: Պարզվում է՝ այդ «տեխնիկական պատճառը» եղել է Նիկոլ Փաշինյանը:
Աշոտյանի պատմելով՝ «Էն կինոներում ոնց է ՝ մի բան ցույց են տալիս, բայց ետնաբեմում առանձին կամերայով նկարում են: Հիմա դա կամերայով նկարած չի եղել, պատմեմ ինչ է եղել՝ վարչապետը մտել է բանակցությունների մեջ մեր խմբակցության ղեկավարի հետ, ԱԺ նախագահի հետ, ԱԺ նախագահն ու ֆրակցիայի ղեկավարը իրեն խոստացել են՝ եթե ուզում է քաղաքական գործընթացը, բանակցությունները շարունակենք, ապա այդ պահին կսառեցնենք օրինագիծը: Օրինագծի քվեարկությունը պետք է լիներ ցերեկը, վարչապետի խնդրանքով, հորդորով, առաջարկությամբ պահանջով, ոնց ուզում եք ձեւակերպեք, եղել է այն, որ մինչեւ օրինագծի վերջնական ճակատագրի որոշումը վարչապետը ասել է գամ ԱԺ, կամ մերոնք գնան հրապարակ ու լինի եւս մի ռաունդ բանակցությունների: Այդ ընթացքում, երբ վարչապետի խնդրանքով կամ առաջարկությամբ հետաձգվեց քվեարկությունը, վարչապետը պետք է գար այստեղ բանակցությունների ռաունդի, որքանով տեղյակ եմ, վարչապետը երբ որ մտել է մեր ֆրակցիա, ասել է՝ բանակցություններ չեն լինելու, իմ վրա հույս չդնեք, ես գնում եմ դեկտեմբերին ընտրությունների…Վարչապետն եկավ եւ ասաց՝ չենք խոսելու: Երեկոյան ինքը գալիս է, մեզ դնում է փաստի առաջ, փաստացի երեկվա արտահերթով հրավիրված նիստը ցերեկվա ընթացիկ քվեարկության շարունակությունն էր: Բանակցություն բառը երեկվա մեր քննարկումներին չի սազում: Լավ կլիներ այդպես լիներ, բայց վարչապետն ասաց իրազեկում, դա իր խոսքն էր, հետեւաբար, բանակցությունների, փոխզիջումների մասին խոսք գնալ չէր կարող»:
Հռիփսիմե ՋԵԲԵՋՅԱՆ
