«Հիմնականում այդքան էլ բանակցություններ չէին, որքան վարչապետն եկել էր իրազեկելու իր կարծիքի մասին: Բանակցությունները սովորաբար լինում են, երբ լինում է փոխզիջում, մեկը մյուսին լսելու ցանկություն»,- Ն. Փաշինյանի հետ բանակցությունների ավարտից հետո դրանց արդյունքների վերաբերյալ Aravot.am-ի հարցին այսպես պատասխանեց ԱԺ ՀՀԿ-ական փոխնախագահ Էդուարդ Շարմազանովը:
Էդուարդ Շարմազանովն ասաց, որ դեմ առ դեմ խոսակցություն չի եղել: Հանդիպմանը ներկա են եղել ԱԺ խմբակցությունների, կառավարության ներկայացուցիչներ, տարբեր հարցեր եւ առաջարկներ են հնչել. «Գլոբալ առումով որեւէ պայմանավորվածություն ձեռք չենք բերել: Մի պայմանավորվածություն ենք ձեռք բերել. բոլորս էլ, կոնկրետ մենք`պատգամավորներս, մտահոգված ենք իրավիճակով եւ մեր թիմի նպատակն է`երկիրը չտանել ցնցումների: Բայց, միեւնույն ժամանակ, նաեւ ԱԺ-ի` որպես օրենսդիր մարմին, անկախությունը պետք է ապահովվի»:
Հարցին`վարչապե՞տն էլ ուներ այդ մտահոգությունները, Էդուարդ Շարմազանովը պատասխանեց. «Պարոն վարչապետը հիմա խոսում է, ինքն իր փոխարեն կխոսի»:
Նա վերահաստատեց`արտահերթ նիստով ընդունված ԱԺ կանոնակարգ- օրենքը որեւէ կապ չունի արտահերթ ընտրությունների սահմանափակման հետ, այլ նպատակ ուներ ԱԺ-ի բնականոն աշխատանքն ապահովելու: Ինքը թեեւ դեմ է քվեարկել կառավարության ծրագրին, հետեւաբար նաեւ արտահերթ ընտրություններին, բայց ՀՀԿ-ն վարչապետին հնարավորություն տվել է:
«Որեւէ բան չենք որոշել, իր առաջարկները պարզ են բոլորիս, կարծում եմ`ճիշտ կլինի նստել`քննարկել»,- ասաց նա:
Հարցին`ինչո՞ւ այժմ բերվեց այդ նախագիծը եւ արտահերթ կարգով ընդունվեց, Էդուարդ Շարմազանովն ասաց, որ իրենք որեւէ պայմանավորվածություն չեն խախտել եւ հակընդդեմ հարց տվեց`իսկ ինչո՞ւ այժմ որոշվեց, որ դեկտեմբերին պետք է ընտրություններ լինեն:
Այլ մանրամասները`տեսանյութում
Նելլի ԳՐԻԳՈՐՅԱՆ
Դուք ցույց եք տալիս,որ իրազեկված չէք երկրում կատարվող անարդարությունից,որ 2016թ-ի ապրիլի 1-ը չնկալեցիք,որ երկիրը տանում եք ստրկացման և կործանման փողի համար,ապացուցում եք’, որ լավ խոսել գիտեք: Մի’թե չէք տեսնում իրավիճակը,որին կայծ հանդիսացավ Նիկոլ Փաշինյանը:Իրեն հարգող մարդը այսպիսի ղեկավարների ղեկավարմամբ կլքեր հայրենիքը:Դուք մի մեծ սխալ եք գործում մոռանալով, որ Հայաստանը մեր հայրենիքն է,հայրն է, մայրն է, երեխան է, ընտանիքն է և այն տրված չէ 1991թ-ից մի քանի բաշիբոզուկների թալանելու և ամայացնելու:Ես չեմ ընտրել հանցագործի,այլ ընտրել եմ պատգամավոր: Դուք նույնիսկ մտահոգություն չարտահայտեցիք Ձեր գործընկերոջ մասով սարքելով նրան քավության նողազ’ ուրանալով,որ տուշոնկան նա չի արտադրել…