Նիկոլ Փաշինյանը հանրահավաքի ժամանակ ասաց, թե ինչ ընթացակարգով է պատրաստվում հրաժարական տալ, ասաց, որ դա կանի, որպեսզի որեւէ մեկը չմտածի, որ ինքը կառչած է ՀՀ վարչապետի պաշտոնից: Նա պարզաբանեց , որ եթե երկու անգամ երկօրյա ժամկետում նոր վարչապետ չընտրվի, խորհրդարանը կլուծարվի:
«Եթե ժողովուրդը կանգնած է՝ հանուն արտահերթ խորհրդարանական ընտրությունների, ուրեմն ժողովրդի հետ կարող ենք թույլ չտալ, որ խորհրդարանը չընտրի նոր վարչապետ: Հրաժարականից հետո ես շարունակում եմ կատարել ՀՀ վարչապետի պարտականությունները: Ու եթե հետո մեր քաղաքական ուժին վստահության քվե կտաք, էլի կընտրվեմ»,-ասաց ՀՀ վարչապետը:
«Ես որպես ՀՀ վարչապետ քսանչորս ժամ հնարավորություն ունեն մուտք գործել ԱԺ տարածք,եւ ես հիմա Դեմիրճյան փողոցով կգնամ ԱԺ տարածք, այդ ընթացքում տեղի չի ունենա ոչ մի բան, ոչ մի ճյուղ, ոչ մի ավտոմեքենա, ոչ մի տերեւ, ոչ մի պատգամավոր չի վնասվի: Ես մուտք կգործեմ ԱԺ տարածք, որպեսզի բանակցեմ այնտեղ գտնվող պատգամավորների եւ քաղաքական ուժերի ներկայացուցիչների հետ ստեղծված քաղաքական իրավիճակի կարգավորման վերաբերյալ եւ դա կանենք սիրո ու համերաշխության մթնոլորտում»,-ասաց Նիկոլ Փաշինյանը:
Գոհար ՀԱԿՈԲՅԱՆ
