Կառավարության անդամները իրենց ֆեյսբուքյան էջերում արձագանքել են ստեղծված իրավիճակին:
Առաջին փոխվարչապետ Արարատ Միրզոյան. «Եվս մի անգամ փաստենք․
Գործող ԱԺ-ն չի ներկայացնում ժողովրդին, լեգիտիմ չի, ստեղծում է սահմանադրական ճգնաժամ և խոչընդոտում է ՀՀ անվտանգությանն ու զարգացմանը»:
Փոխվարչապետ Տիգրան Ավինյան. «Ազգային ժողովը կրկին ու կրկին ապացուցում է իր լեգիտիմության բացակայությունը։
Ցավոք, հեռատեսությունը երբեք չի եղել այս գումարման ԱԺ-ի ուժեղագույն կողմը։
Մենք էլ առաջ ենք շարժվում մեր ծրագրով՝ շուտով տեղի են ունենալու արտահերթ ընտրություններ»:
Կրթության եւ գիտության նախարար Արայիկ Հարությունյան. «Երբ տեղի ունեցավ Հեղափոխությունը, մենք հայտարարեցինք, որ խորհրդարանական արտահերթ ընտրություն չենք նախաձեռնում, որովհետև քաղաքական մյուս ուժերը պետք է պատրաստվեն դրան։ Միաժամանակ նշում էինք, որ Հեղափոխությունից անմիջապես հետո ամենաշատը մեզ էր ձեռնտու ընտրություն անցկացնելը, քանի որ կարող էինք ստանալ բացարձակ մեծամասնություն, բայց դա չենք անում վերոնշյալ պատճառով։
Սակայն հիմա, երբ ասում ենք, որ ընտրությունների ժամանակը մոտենում է, ասում են՝ քաղաքական ուժերն էլի պատրաստ չեն։ Է, ո՞նց պատրաստ լինեն, եթե ընտրություններին նախապատրաստվելու, կառույցներն ուժեղացնելու փոխարեն ոմանք սատանի մայլում քյանդրբազություն են անում, ուրիշ ոչինչ»:
