«Մենք արտահերթ ընտրություններ կունենանք նոյեմբերի վերջին, դեկտեմբերի սկզբին, որովհետեւ Երեւանի քաղաքապետի ընտրությունների քարոզարշավի ժամանակ ես հարց դրեցի Երեւանի քաղաքացիների առաջ, ասացի ովքեր կողմ են արտահերթ խորհրդարանական ընտրություններին, պետք է կողմ քվեարկեն «Իմ քայլը» դաշինքի օգտին, իսկ «Իմ քայլը» ութսունմեկ տոկոս ձայն հավաքեց: Սա նշանակում է, որ արտահերթ ընտրությունները պետք է տեղի ունենան անհետաձգելիորեն»,-բազմահազարանոց հանրահավաքում հայտարարեց Նիկոլ Փաշինյանը:
Երեւանի նորընտիր քաղաքապետ Հայկ Մարությանը եւս հանրահավաքի հարթակի վրա էր, նա շնորհակալություն հայտնեց աջակցության համար:
Իսկ Նիկոլ Փաշինյանը հայտարարեց, որ ժողովրդի ներկայությամբ ստորագրում է ԲՀԿ-ական, ՀՅԴ-ական նախարարներին աշխատանքից ազատելու մասին որոշումներ՝ Հրաչյա Ռոստոմյանին, Արծվիկ Մինասյանին, Արթուր Գրիգորյանին, Լեւոն Վահրադյանին, Աշոտ Հակոբյանին, Արթուր Խաչատրյանին: Փաշինյանն ասաց, որ ԲՀԿ-ական փոխվարչապետ Մհեր Գրիգորյանը ցանկացել է մնալ եւ աշխատել իր հետ: Նա կոչ արեց ողջունել փոխվարչապետին:
Գոհար ՀԱԿՈԲՅԱՆ
Հ. Գ. Ըստ «Երկիր մեդիայի»՝ Տնտեսական զարգացման եւ ներդրումների նախարար Արծվիկ Մինասյանը հարցին, թե արդյոք նրան կառավարության աշխատակազմից հայտնել են՝ աշխատանքից դուրս գալու դիմում գրել, ինչպես հանրահավաքում հայտարարել է վարչապետ Փաշինյանը, պատասխանեց, որ նման հեռախոսազանգ չի ստացել։ Ի դեպ, նույնը տեղեկացրեց գյուղատնտեսության նախարար Արթուր Խաչատրյանը։
