«Դա ոստիկանության եւ իշխանության խնդիրն է»,- խորհրդարանում արտահերթ նիստում ԱԺ կանոնակարգ-օրենքի քվեարկությունից հետո, Aravot.am-ի հարցին այսպես պատասխանեց ՀՀԿ խմբակցության ղեկավար Վահրամ Բաղդասարյանը`պատասխանելով հարցին`հնարավո՞ր է բախումներ լինեն, քանի որ մարդիկ խորհրդարանը շրջափակել են:
ԱԺ ՀՀԿ-ական փոխխոսնակ Էդուարդ Շարմազանովը քվեարկությունից հետո, լրագրողների հետ զրույցում ասաց, որ այս քվեարկությամբ իրենք իրավիճակը չեն սրել:
ԱԺ արտաքին հարաբերությունների հանձնաժողովի նախագահ Արմեն Աշոտյանն էլ ասաց, որ իրենք այսպիսով ամրապնդել են Սահմանադրությունը:
Հիշեցրեց`իրենք դեմ չեն արտահերթ խորհրդարանական ընտրություններին, բայց այս նախագիծը եւ քվեարկությունը գործընթացները քաղաքական դաշտ բերելու եւ քաղաքական տրամաբանությամբ տանելու երաշխիք է: Հուսով են, հարցերը կլուծվեն Սահմանադրության շրջանակներում, քանի որ արտահերթ ընտրությունների գործընթացը չի կարող ուժի կիրառմամբ լինել:
Ինչ վերաբերվում է խորհրդարանը շրջափակած մարդկանց եւ պատգամավորների հնարավոր առճակատումներին, Արմեն Աշոտյանն ասաց, որ Նիկոլ Փաշինյանը մարդկանց հետ կարողանում է լեզու գտնել եւ եթե ցանկանա`հնարավոր կլինի խուսափել բախումներից:
Նելլի ԳՐԻԳՈՐՅԱՆ
