2018թ. դեկտեմբերին Հայաստանում տեղի կունենան արտահերթ խորհրդարանական ընտրություններ: Քիչ առաջ այս մասին լրագրողների հետ զրույցում հայտարարեց ՀՀ վարչապետ Նիկոլ Փաշինյանը: Նիկոլ Փաշինյանն այսօր խորհրդարանում էր, նա հանդիպել էր ԱԺ նախագահ Արա Բաբլոյանի հետ, հետո զրույց ունեցավ ՀՀԿ խմբակցության ղեկավար Վահրամ Բաղդասարյանի հետ՝ նրա աշխատասենյակում:
Ի դեպ, Արա Բաբլոյանը Նիկոլ Փաշինյանի հետ զրույցից հետո խորհրդարանից հեռացավ բավական անտրամադիր եւ լրագրողների որեւէ հարցի չպատասխանեց:
Վարչապետ Նիկոլ Փաշինյանը լրագրողների հետ զրույցում ասաց, որ իրեն դուր չի եկել եւ վրդովվեցրել է խորհրդարանական երկու խմբակցությունների՝ ՀՀԿ-ի եւ «Ծառուկյան» դաշինքի պատգամավորների առաջարկած ԱԺ կանոնակարգ-օրենքում փոփոխությունը, որը սահմանափակում է խորհրդարանի ինքնալուծարման հնարավորությունը: Այդ նախագծին կողմ է արտահայտվել նաեւ ՀՅԴ-ն:
Նիկոլ Փաշինյանը հայտարարեց, որ իր կարծիքով՝ այո, Հայաստանում կա հակահեղափոխություն եւ ինքը պատրաստվում է դրա դեմն առնել:
Այլ մանրամասներ Նիկոլ Փաշինյանը կհայտնի ֆեյսբուքյան ուղիղ եթերի միջոցով:
ԱԺ բոլոր խմբակցությունների ղեկավարները հավաքվել են գրադարանում եւ քննարկում են անում:
Նելլի ԳՐԻԳՈՐՅԱՆ
Եթէ կարողանաք դեկտեմբերին անցկացնել, դա միայն ողջունելի ու խրախուսելի կը լինի: Նաեւ անձնապէս եմ շահագրգիռ: Դեկտեմբեր 3-30-ին Հայաստանում եմ լինելու եւ մինչեւ ՀՀ քաղաքացիութեանս դադարեցումը կը հասցնեմ երկրորդ եւ վերջին անգամ քուէարկել: Կեանքում առաջին անգամ քուէարկել եմ 2008-ին՝ Լեւոն Տէր-Պետրոսեանի օգտին 🙂
Բայց դեկտեմբերի դէպքում ՀՀԿ-ԲՀԿ-ՀՅԴ «դժգոհութիւնը» մեծ է լինելու՝ ինչպէս որ տեսնում ենք:
Սահմանադրութիւնը հանրաքուէով փոխել, յետոյ գնալ ԱԺ ընտրութիւնների՝ թէեւ ժամանակատար է, բայց աւելի ապահով է: Այդ դէպքում ընտրութիւնները կարող են լինել փետրուարին: