Aravot.am-ը պրոֆեսիոնալ բռնցքամարտիկներ Արամ Ավագյանից եւ Գոռ Երիցյանից հետաքրքրվեց, թե վերջին շրջանում բռնցքամարտի ֆեդերացիայի եւ ՀԱՕԿ-ի միջեւ ծագած տարաձայնությունները չե՞ն ազդել մարզումների վրա: «Ոչ: Հիմա նորմալ մարզվում ենք Օլիմպավանում», – պատասխանեցին նրանք:
Հետաքրքրվեցինք նաեւ, թե պրոֆեսիոնալ ռինգ տեղափոխվելուց հետո նրանք մտադի՞ր են մասնակցել Տոկիոյի օլիմպիական խաղերին, ինչին Գոռ Երիցյանը պատասխանեց, որ այդպիսի պլաններ կան, իսկ Արամ Ավագյանն ասաց. «Սիրողական եւ պրոֆեսիոնալ բռնցքամարտերը միմյանցից տարբեր են: Սիրողականում մրցավարությունը մեծ առեւտուր է, որտեղ նրանց համար բացարձակ հետաքրքիր չի, թե մարզիկը ինչպիսի դժվար ու դաժան ճանապարհ է անցել մինչեւ օլիմպիական ռինգ հասնելը: Ես դա իմ վրա զգացի Ռիո-Դե-Ժանեյրոյում ու շատ հիասթափվեցի: Բայց ես շուտ հանձնվողներից չեմ: Ես օլիմպիական խաղերում կիսատ թողած գործ ունեմ: Այլ բան է պրոֆեսիոնալ բռնցքամարտը: Այնտեղ ոչ մի կազմակերպիչ ու մրցավար որպես կանոն իրեն բռնցքամարտիկին ռինգում սխալ գնահատել թույլ չի տա, թեեւ հազվագյուտ դեպքերում բացառություն կարող է լինել: Պրոֆեսիոնալ բռնցքամարտում լավ են գիտակցում, որ եթե կողմնապահություն անեն կամ սխալ որոշում կայացնեն, ապա հանդիսականը, որ գումար է վճարում, հաջորդ անգամ չի գա, հեռուստաընկերությունները, որոնք գնում են հեռարձակման իրավունքը, իրենց հետ չեն համագործակցի»:
Աշոտ ՀԱԿՈԲՅԱՆ
