Բնապահպանության և ընդերքի տեսչական մարմնի նախաձեռնությամբ այսօր Ալավերդիում տեղացիներն ու բնապահպանները քննարկեցին պղնձաձուլական գործարանը փակել, չփակելու հարցը: Ըստ փորձագետների՝ վերջին ամիսներին գործարանից արտանետվող ծուխը մի քանի անգամ ավելացել է, տեղացիների առողջության համար դարձել լուրջ սպառնալիք:
Տեսչական մարմնի ղեկավար Արթուր Գրիգորյանի խոսքով՝ պատային իրավիճակ է ստեղծվել, սակայն տեղացիների հետ պետք է բաց խոսել. «Չենք ուզում ջայլամի քաղաքականություն վարել, հանձնարարություն տանք՝ հասկանալով, որ դա չի իրականացվելու, հետո գնանք մի հատ էլ ստուգում անենք, հասկանանք, որ չի իրականացվել, հարցին պետք է լուծում տալ»:
Գործարանը շահագործող «ACP ԱՐՄԵՆԻԱՆ ՔԱՓԸՐ ՓՐՈԳՐԱՄ» ընկերությունում այսօր էլ հայտարարեցին՝ Հայաստանի եւ Չինաստանի կառավարությունների բանակցությունների դրական արդյունքում կկառուցվի նոր, գերժամանակակից պղնձաձուլական գործարան: «Մեկ գոտի, մեկ ուղի» ծրագրի շրջանակներում առաջարկվում է կառուցել նոր գործարան:
Երբ քննարկմանը ներկա ալավերդցիները սկսեցին թունավոր նյութերի արտանետումների մասին բարձրաձայնել, ընկերության տնօրեն Լուսինե Մեջլումյանը հակադարձեց՝ անհիմն բաներ են խոսում. «Կարո՞ղ եք հիմնավորել ցինկ, երկաթ որտեղից, ամեն մարդ, որ խոսի իր գիտելիքների ու ունեցած տվյալների հիման վրա»:
Քննարկումների շարունակվելու են:
Արփինե ՍԻՄՈՆՅԱՆ
