Սեպտեմբերի 30-ին «Նաիրի» բժշկական կենտրոնում 16-ամյա երեխայի մահվան հետեւանքով վիճաբանություն է տեղի ունեցել երեխայի հարազատների ու բուժող բժիշկների միջեւ, ինչի արդյունքում բժիշկ Գալուստ Գալուստյանը լուրջ մարմնական վնասվածքներ է ստացել: Aravot.am-ի տեղեկություններով, մահացած երեխայի հարազատներից մեկն է բժշկին հարվածել, ինչի հետեւանքով նա գանգուղեղային վնասվածք է ստացել: Ըստ մեր ունեցած տեղեկությունների, մահացած երեխան ոստիկանության Ներքին զորքերի նախկին հրամանատար Լեւոն Երանոսյանի (լուսանկարում) բարեկամն է եւ միջադեպի առիթով, պարոն Երանոսյանը հիվանդանոց է եկել՝ իրավիճակը հանդարտեցնելու:
Միջադեպի մասին լուրը Aravot.am-ի հետ զրույցում հաստատեցին ՀՀ ոստիկանության լրատվական ծառայությունից՝ նշելով, որ սեպտեմբերի 30-ին, ժամը 1 անց 35 ոստիկանությունը «Նաիրի» բուժկենտրոնից հաղորդում է ստացել, որ Ս.Գ. անունով մի քաղաքացի բժշկի վրա հարձակում է գործել եւ բռունցքով հարվածել նրա, ինչի արդյունքում բժիշկը փակ գանգուղեղային վնասվածք է ստացել:
Ոստիկանությունից նաեւ ասացին, որ ըստ բժշկի տված եզրակացության, վնասվածքներ ստացած բժիշկն այդ պահին ի վիճակի չի եղել դեպքի մասին բացատրություններ տալ եւ նշանակվել է դատաբժշկական փորձաքննություն:
Ուշագրավ է, որ դեպքի մասին այլ մանրամասներ հայտնեց «Նաիրի» բուժկենտրոնի բուժծառայության գծով տնօրեն Անատոլի Գնունին: Պարոն Գնունին Aravot.am-ի հետ զրույցում ասաց, որ բժշկին չեն ծեծել, այլ՝ ինքն է սայթաքել ընկել ու վնասվածքներ ստացել: Մեր այն դիտարկմանը, թե ոստիկանությունից այլ վարկած են նշել, Անատոլի Գնունին ասաց, որ անձամբ է բժշկի հետ խոսել, որն էլ իրեն պատմել է եղելությունը: Ըստ տնօրենի, մահացած երեխայի հարազատները փորձել են ներս մտնել այն պահին, երբ ներսում երեխայի հետ կապված գործողություններ են իրականացվել եւ այդ պահին էլ բժիշկը սայթաքել վայր է ընկել:
Պարոն Գնունու խոսքով, բժիշկը դեռ չի հարցաքննվել: Ոստիկանությունից ավելի ուշ հայտնեցին, որ դեպքի առնչությամբ այս պահին ոստիկանության կենտրոնական բաժնում հետաքննություն է իրականացվում:
Անատոլի Գնունին մեզ հետ զրույցում ասաց, որ 16-ամյա երեխայի մոտ ախտորոշվել է օստեոսարկոմա եւ նա վիրահատության արդյունքում ընկել է կոմայի մեջ եւ 52 օր շարունակ բժիշկները պայքարել են նրա կյանքի համար:
Լուսինե ԲՈՒԴԱՂՅԱՆ
