Ամուլսարի հանքի շահագործման դեմ պայքարող ակտիվիստներն այսօր ամփոփեցին իրենց պայքարի 100 օրը:
«Նոյան տապան» ակումբում ակտիվիստ Վազգեն Գալստյանը հիշեցրեց, որ Ամուլսարի պայքարը 2011-ի աշնանից է սկսվել, բայց տեղացիների ակտիվ ներգրավվածությունն այս տարվանից է: Պայքարի 100 օրվա ընթացքում, ըստ նրա, բավական հետաքրքիր զարգացումներ են եղել.
«Ու մենք ինչ-որ առումով թրծվեցինք, ամբողջ համայնքը միաբան կարողացավ դիմակայել ճնշումներին, այն խաղերին, որ ներդրող « Լիդիան Արմենիան» անում էր պայքարը ճնշելու համար»:
Նա նաեւ ասաց, որ տեղեկատվական դաշտում լուրջ արշավ է տարվել ցույցի մասնակիցների դեմ, եւ այդ արշավը սկսվեց, երբ «Լիդիան Արմենիայից» մի քանի անգամ փորձեցին տեղացիների մեջ միջհամայնքային լարվածություն ստեղծել. «Բայց կոնֆլիկտի որեւէ հնարավորություն չկարողացան ստեղծել: 200 մարդ բերեցին Երեւանից, պրովոկացիոն իրավիճակներ ստեղծեցին, բայց հակահարված ստացան ու վռնդվեցին Ջերմուկ քաղաքից»:
Արտակ Բունիաթյանն էլ ասաց, որ ի տարբերություն մյուս հանքերի, Ամուլսարը, որ պատրաստվում էին վերածել հանքավայրի, գտնվում է հանքաջրաբուժական առողջարանին շատ մոտ, եւ կա հանքաջրաբուժական առողջարանական խնդիր: «Ուսումնասիրել եմ եւ երկիր մոլորակի վրա չեմ գտել մի վայր, որտեղ հանքաջրաբուժական առողջարանի մոտ գտնվի նման մետաղական հանք: Գտնում եմ, որ Ամուլսարը հանք շահագործելով ոչ միայն բնապահպանական մեծ ռիսկեր են առաջ գալիս, այլեւ բնակավայրի սոցիալտնտեսական ուղղվածության խնդիր է առաջանում»,- ասաց Արտակ Բունիաթյանը:
Արփինե ՍԻՄՈՆՅԱՆ
