Ասուլիսը տապալվեց: Բռնցքամարտում երկու բանակի բաժանված կողմերը դիրքերը չեն ուզում զիջել

Վերջին շրջանում Հայաստանում հենակետային համարվող բռնցքամարտի աշխարհում տիրող լարված մթնոլորտը չի հանդարտվում ու այդպիսի միտում, կարծես, չի նշմարվում:

Մի կողմը պաշտպանում է Հայաստանի բռնցքամարտի ֆեդերացիայի ներկայիս նախագահ Արթուր Գեւորգյանին, մյուս՝ դժգոհ կողմը, դեմ է, որ նա շարունակի ղեկավարել ու հիմնել է այլընտրանքային՝ Բռնցքամարտի հայկական ազգային ֆեդերացիա:

Զարգացող գործընթացները ցույց են տալիս, որ գոնե այս պահի դրությամբ կողմերը չեն ցանկանում բանակցել, փոխզիջումային տարբերակներ, առավել եւս՝ հաշտության եզրեր գտնել: Դրա փոխարեն միմյանց մեղադրում են այն բանում, որ ստեղծված իրավիճակը հասկանալու, գնահատելու, առկա խնդիրները միմյանց երեսին ասելու հրավերները փոխադարձաբար մերժվել են: Յուրաքանչյուրը գերադասում է իր առանձին հրապարակային ելույթներն ունենալ:

Այսօր «Պոստ սկրիպտում» մամուլի ակումբում պետք է կայանար բռնցքամարտի նորաստեղծ հայկական ազգային ֆեդերացիայի ներկայացուցիչների՝ Արամ Հարությունյանի, Վազգեն Բադալյանի, Ռաֆայել Մեհրաբյանի, Սամսոն Խաչատրյանի եւ Սամվել Գասպարյանի ասուլիսը: Նրանք, ինչպես նշված էր տարածված մամուլի հաղորդագրությունում, պետք է խոսեին հայկական բռնցքամարտում ծավալվող վերջին իրադարձությունների իրենց պատկերացումների եւ հետագա քայլերի մասին:

Ասուլիսը դեռ նոր էր սկսվել, երբ սենյակ մտան մյուս թեւի կողմնակիցները: Հորդորները՝ չխանգարել, արդյունք չտվեցին: Առաջարկ եղավ, որ արդեն հրավիրվածների ասուլիսից անմիջապես հետո եւս մեկը կազմակերպել մյուս կողմի համար: Չստացվեց ու արդյունքում ասուլիսը չեղյալ հայտարարվեց:

Աշոտ ՀԱԿՈԲՅԱՆ