«Այսքան տարի հորդորում ենք դադարեցնել Սեւանից ջրառը, իսկ դուք ձեր մտահոգություններով հանդերձ`անընդհատ քվեարկում էիք կողմ: Հիմա եկել եք`մտահոգությունների մասի՞ն եք խոսում: Ո՞ւմ եք հիմարի տեղ դնում: Դուք թույլ չեք տալիս, որ մենք խոսենք եւ ստիպված ենք այս կարգով դրա մասին ասել»,- այսօր «Սեւանա լճի հիմնախնդիրները» թեմայով ԱԺ տարածքային կառավարման, տեղական ինքնակառավարման, գյուղատնտեսության և բնապահպանության հարցերի մշտական հանձնաժողովի կազմակերպած խորհրդարանական լսումների ժամանակ պատգամավորին նախատեց բնապահպան Սիլվա Ադամյանը։ Նրան դուր չէր եկել լսումների սահմանված կարգը, որով խոսքի առաջնահերթություն է տրվում պատգամավորներին:
ՀՀԿ-ական պատգամավոր Խոսրով Հարությունյանը նախ փորձեց հանգիստ տոնով բացատրել, որ հասարակական կազմակերպությունների ներկայացուցիչների ձայնը միշտ էլ լսելի է եղել եւ խորհրդարանական քննարկումներում այդ կարծիքներին մեծ տեղ է տրվել, հաշվի է առնվել:
Սիլվա Ադամյանը չէր հանդարտվում: Խոսրով Հարությունյանը նույնպես վրդովվեց եւ վրդովմունքը զսպելու համար դուրս եկավ դահլիճից:
Հանձնաժողովի նախագահ Վարդեւան Գրիգորյանը միջամտեց. «Երբ քննարկվել է Սեւանի հարցը, բոլոր հ/կ-ները հրավիրվել են եւ նույնիսկ ավելի իրավունք են ստացել, քան պատգամավորները: Այս խորհրդարանը երկու անգամ ջրառի հարց է քննարկել, երկու անգամն էլ հասարակական կազմակերպությունները հրավիրվել են»:
Սիլվա Ադամյանը միեւնույն է, չէր հանդարտվում. «Դուք նույնն եք մնացել, ամեն ինչ նույնն է մնացել, ոչինչ չի փոխվել»,-նետեց բնապահպանը:
Նելլի ԳՐԻԳՈՐՅԱՆ
