ԱԱԾ և ՀՔԾ պետերի հեռախոսազրույցի գաղտնալսումից հետո Նիկոլ Փաշինյանը ոստիկանապետին հրահանգեց օլիգարխներին ու նրանց թիկնապահներին «փռել ասֆալտներին», հետո ավելի կոշտացրեց առաջարկվող պատիժը՝ պատերին տալ։ «Այս երեխաները Հայաստանում հեղափոխություն են արել, և մենք ոչ միայն ասֆալտին կփռենք, այլ նաև պատերով կտանք ցանկացած մեկի, ով կհամարձակվի այս երեխաների հաղթանակը նրանց ձեռքից խլել»,- հայտարարեց վարչապետը, դրան հետևեցին ասֆալտին փռվածների մասսայական տեսարանները, ու ի՞նչ։ Ի՞նչ հարց լուծեց Փաշինյանը «պատերին տալով» ու «ասֆալտին փռելով», դժվար է ասել։ Իսկ ոստիկանությանն այլ բան չէր մնում, քան ուղիղ հասկանալ ասվածն ու կատարել վարչապետի հրահանգը։ Իհարկե, լավ ենք պրծել, որ պատերին տալու տեսարաններ չեն եղել ու չեն տեսագրվել, այլապես պատկերացնու՞մ եք` ինչ սարսափ ֆիլմ կստացվեր։
Փոխոստիկանապետ ՀՈՎՀԱՆՆԵՍ ՔՈՉԱՐՅԱՆԻՑ հետաքրքրվեցինք` ու՞ր են հասել ոստիկաներն ասֆալտ փռելու օպերացիայում։
-«Ասֆալտին փռելը» հրապարակային խոսք էր,- ասաց փոխոստիկանապետը։- Ոստիկանությունն ասֆալտին փռելու հրահանգն ուղիղ չի հասկացել։ Մենք ասվածը հասկացել ենք այլ կերպ՝ ուժեղացնել զենքի ապօրինի շրջանառության վերահսկողությունն այն անձանց շրջանակում, որոնք հանցագործությունների պոտենցիալ հակվածություն ունեն և նախկինում էլ աչքի են ընկել հակաիրավական արարքներ կատարելով։ Ասֆալտին փռելը ոստիկանությունն ավելի ճիշտ է հասկացել, քան հասարակության մի մասը։
-Հիմա շարունակվու՞մ է այդ օպերացիան, և ընդհանրապես, առանց հիմքի որևէ մեկին հնարավո՞ր է ասֆալտին փռել։
-Առանց հիմքի չենք պատրաստվում որևէ մեկին փռելու ասֆալտին։ Հիմքերը կասկածներն են, որոնք շատ դեպքերում օպերատիվ բնույթի են և մինչև միջոցառում անցկացնելը հրապարակման ենթակա չեն։ Այսինքն, օպերատիվ տեղեկությունների ստուգման ձև գոյություն ունի, որը ոստիկանությունը կիրառում է, ու միշտ չէ, որ դա բացահայտ քննչական գործողություններով է արվում։ Երբ դրանում ներգրավվում են հատուկ նշանակության ջոկատի տղաները, մի տեսակ միստիկ բովանդակություն է ստանում միջոցառումը և տարատեսակ մեկնաբանությունների առիթ տալիս։ Այնինչ ոստիկանությունն ավելի ակտիվ է աշխատում, հանցավորությունը զսպելու ուղղությամբ ավելի գործուն միջոցներ է ձեռնարկում։
-«Ավելի» բառը ենթադրում է, որ նախկինում պակա՞ս արդյունավետությամբ էր ոստիկանությունն աշխատում։
-Նկատի ունեմ գործելակերպի փոփոխությունները, որոնք թույլ կտան ոստիկանությանն ավելի լավ արդյունքի հասնել։ Արդյունքի հասնելու տարբեր ձևեր կան, գործելակերպում որոշակի փոփոխություններ են կատարվել։ Ավելի շատ ժամանակ է տրվում օպերատիվ տվյալների ստուգմանը, որովհետև երկրում կայուն վիճակ է, իրավակարգի սպառնալիքներ չկան, ոստիկանությունը ծանրաբեռնված չէ հասարակական կարգը պահպանող զանգվածային միջոցառումներով, ինչպես նախկինում էր։ Սա հնարավորություն է տալիս մեր ուժերն ու միջոցներն ավելի թիրախային օգտագործելու։
Ճեպազրույցը՝
Ռուզան ԽԱՉԱՏՐՅԱՆԻ
Հոդվածն ամբողջությամբ կարող եք կարդալ «Իրատես» թերթի այսօրվա համարում
