Քիչ առաջ ավարտվեց ՀՀԿ Գործադիր մարմնի նիստը: Մասնակցում էր Սերժ Սարգսյանը: Դուրս գալով նիստից՝ ՀՀԿ ԳՄ անդամ Գալուստ Սահակյանը հայտարարեց՝ արտահերթ խորհրդարանական ընտրությունների անցկացման մասին հարցը քննարկել են, սակայն կուսակցության տեսակետ որպես այդպիսին չկա, և ինքը հայտնել չի կարող: Գալուստ Սահակյանն անձամբ դեմ է խորհրդարանի ինքնալուծարմանը: Այս առիթով նա մանրամասնեց. «Ինքնալուծարում նշանակում է պետության համար ամենավտանգավոր երևույթներից մեկը»:
Հարցին՝ հնարավո՞ր է Սերժ Սարգսյանը վերադառնա ակտիվ քաղաքականություն, Գալուստ Սահակյանը պատասխանեց. «Սերժ Սարգսյանը հիմա էլ ակտիվ քաղաքականության մեջ է»:
Այն դիտարկմանն ի պատասխան, թե քաղաքական ուժերն ասում են, որ խորհրդարանը չի արտահայտում ժողովրդի ցանկությունը, Գալուստ Սահակյանն ասաց. «ՀՀԿ-ականները երբեք ու երբեք որևէ մեկի դեմ չեն: Եթե լինեն խորհրդարանական ընտրություններ, մենք էլ մեր մասնակցությունը կունենանք. ինչքան ձայն կունենանք, այդ ձայներով կմասնակցենք»:
Դառնալով հարցին՝ ՀՀ երկրորդ նախագահ Ռոբերտ Քոչարյանի հետ պատրա՞ստ են համագործակցել, Գալուստ Սահակյանը պատասխանեց. «Ցանկացած քաղաքական ուժի հետ պատրաստ ենք համագործակցել, եթե դա բխում է պետության շահերից»:
Հարցին՝ բացառո՞ւմ է, որ կլինեն ՀՀԿ-ականներ, որոնք կողմ կքվեարկեն Նիկոլ Փաշինյանին, Գալուստ Սահակյանը պատասխանեց. «Չեմ կարծում, որ խորհրդարանական մեծամասնությունը պիտի գնա այն ճանապարհով, ինչ ուզում է կառավարությունը»:
Դառնալով Նիկոլ Փաշինյանի հետ բանակցություններին՝ Գալուստ Սահակյանն ասաց՝ կառանձնացնենք մարդկանց, որոնք կբանակցեն:
Գալուստ Սահակյանը հայտարարեց. «Արտահերթ ընտրությունների անցկացման ժամանակ բնականաբար կմասնակցենք: Նույնիսկ, եթե կուսակցությունը չհաղթահարի շեմը, կմնա ամենաարժանապատիվ ուժը»:
Հարցին՝ ինչո՞ւ են դեմ, որ արտահերթ ընտրություններ լինեն, Գալուստ Սահակյանը պատասխանեց. «ԱԺ-ն կառավարության ծրագիրը հաստատել է, որտեղ գրված է՝ մեկ տարի ժամկետում կլինեն արտահերթ ընտրություններ: Եթե ժամանակը գա, կխոսենք այդ մասին»:
Խնդիրը ՀՀԿ-ականները չեն, այլ այն, որ չի կարելի՝ ԱԺ-ն ինքնուրույն լուծարվի: Ինքնուրույն լուծարվելու օրենսդրություն էլ չկա»:
Հարցին, եթե չլինի խորհրդարանում ինչո՞վ է զբաղվելու, Գալուստ Սահակյանը պատասխանեց. «Վայ, ձեզ թվում է ես զբաղվելու բան չունե՞մ: Ձեզ հետ միասին կզբաղվեմ»:
Տաթև ՀԱՐՈՒԹՅՈՒՆՅԱՆ
