«Երեւանյան գունազարդ վազք 2018» նախագծի կազմակերպիչները այսօր հրավիրված մամուլի ասուլիսում ներկայացրեցին միջոցառման նպատակները, ծանոթացրին մասնակցության պայմաններին, օրակարգին և գունազարդ նախաձեռնության շրջանակում իրականացվող բարեգործական ծրագրին:
«Գունազարդ վազք» նախագիծը առաջին անգամ անցկացվել է 2015 թվականին: Այս տարի չորրորդ մեկնարկը նվիրված է Երևանի 2800 ամյակին:
«Run Armenia» նախագծի հիմնադիր-նախագահ, Հայաստանի «Սթրիթ Վորքաութ» ֆեդերացիայի նախագահ, «Երևանյան գունազարդ վազք» միջոցառման գլխավոր կազմակերպիչ Ղազար Հակոբյանն ասաց. «Այս նախագծով ցանկանում ենք մեր Երևանը ներկայացնել ավելի գեղեցիկ, գունավոր, ակտիվ և երջանիկ: Միջոցառումն անցկացվելու է սեպտեմբերի 30-ին: Մեկնարկը կտրվի Ստեփան Շահումյանի անվան հրապարակից: Նախորդ տարիների համեմատ վազքուղու երկարությունը 5000-ի փոխարեն 2800 մետր է՝ Երևան քաղաքի ծննդյան 2800 ամյակի առթիվ: Այս տարի ևս միջոցառումն ունի բարեգործական ուղղվածություն: Վազքից ստացված հասույթի մի մասը հատկացվելու է «Անի-Հայկուհի հիմնադրամ» բարեգործական ծրագրին, որն աշխատանքներ է իրականացնում Հայաստանում քաղցկեղի բուժման պրակտիկան բարելավելու նպատակով: Առաջին անգամ Երևանյան գունազարդ վազքին մասնակցելու են նաև ֆիզիկական սահմանափակ կարողություններով մոտ 20 անձինք»:
Ղազար Հակոբյանը հավելեց, որ միջոցառման շուրջ հետաքրքրությունը տարեց-տարի ավելանում է, և Երեւանյան գունազարդ վազք 2018-ին միացել է նաև Հայ-ռուսական (սլավոնական) համալսարանը:
Հայաստանի «Սթրիթ Վորքաութ» ֆեդերացիայի ղեկավար Արթուր Հարությունյանը մի քանի մանրամասն ներկայացրեց. «Միջոցառումը սկսվելու է ժամը 9:00-ին ֆիթնես նախավարժանքով: 2800 մ երկարություն ունեցող վազքուղու երկարությամբ լինելու են չորս գունազարդ կետեր, որտեղ մասնակիցների վրա կլցվեն գունավոր փոշեներկեր: Դրանք բացարձակ անվնաս են: Իսկ վազքուղու ավարտին տեղի կունենա ավանդական երաժշտական գունազարդ հրավառությունը և Color Party-ն: Արդյունքների արձանագրում չի իրականացվելու, սակայն մրցատարածությունն առաջինն անցած երեքական տղաները և աղջիկները կպարգևատրվեն մրցանակներով»:
Ղազար Հակոբյանն Aravot.am-ին ասաց նաեւ, որ այդ օրը սպասվում է զբոսաշրջիկների մասնակցություն: «Ցանկանում ենք, որպեսզի աշխարհի տարբեր երկրներից ու քաղաքներից ժամանած մեր հյուրերը Երեւանից վառ հիշողություններ տանեն, ինչու չէ, նաեւ հեռանան մի քիչ ավելի առողջացած»:
Աշոտ ՀԱԿՈԲՅԱՆ
