ՀՀ ԱԺ պաշտպանության եւ անվտանգության հարցերի մշտական հանձնաժողովում այսօր քննարկվում էր «Ոստիկանության մասին» ՀՀ օրենքում փոփոխություն եւ լրացում կատարելու մասին օրենքի նախագիծը:
ՀՀ փոխոստիկանապետ Հովհաննես Քոչարյանի տեղեկացմամբ, նախագիծը ներկայացվել է օրենսդրական բացը լրացնելու համար, որով իրավական հիմք է ստեղծվում ինչպես քրեական դատավարության մասնակիցների, այնպես էլ օրենքով պաշտպանության ենթակա այլ անձանց նկատմամբ ոստիկանության կողմից պաշտպանության միջոցների իրականացման կարգը սահմանելու համար:
«Առաջարկվում է հստակ սահմանել, որ ոստիկանությունը պարտավոր է միջոցներ ձեռնարկել ապահովելու պետության կողմից քրեական դատավարության մասնակիցների, այդ թվում նաեւ հանցագործության մասին հաղորդում տվող անձանց և այլ անձանց պաշտպանությունն իրականացնելու պարտականության կատարումը և վերջիններիս անվտանգության պատշաճ ապահովումը»,-ներկայացրեց փոխոստիկանապետը՝ հավելելով, որ քրեական դատավարության մասնակիցները ՀՔԾ առանձին գործերով պաշտպանված չեն:
Պաշտպանության ենթակա անձանց նկատմամբ ոստիկանության կողմից պաշտպանության միջոցներն իրականացվում են կառավարության որոշմամբ սահմանված կարգով:
Հանձնաժողովի նախագահ Կորյուն Նահապետյանին մտահոգում էր`արդյոք նախագիծը ենթադրում է պաշտպանության ենթակա անձանց սահմանափակումներ: Փոխոստիկանապետը հավաստիացրեց`սահմանափակումներ չե ենթադրվում, բայց եթե անձը դեմ է, պետք է դադարեցվեն, անգամ եթե նրա կյանքին իրական վտանգ է սպառնում:
«Հնարավոր է ավելի որոշակիացնել առաջարկվող կարգավորումը, եթե համաձայնվեք, կարող եմ նախագծում առաջարկել, որ այլ պաշտոնատար անձանց պաշտպանության կարգը պետք է իրականացվի նույն կերպ, ինչպես քրեական դատավարության մասնակիցների, որովհետև տարբերություն չկա, ում կյանք ու գույքն ենք պաշտպանում»,- պատգամավորի մտահոգությունը փարատեց փոխոստիկանապետը:
Մանրամասները`տեսանյութում
Նախագիծը հետաձգվեց մեկ շաբաթով`լրամշակումների համար:
Նելլի ԳՐԻԳՈՐՅԱՆ
