Նոր իրողություններ Փաշինյանի եւ բոլորի համար

Ժողովրդավարական ընտրություններ անցկացնելու մշակույթի հիմքը դրված է

Վարչապետ Նիկոլ Փաշինյանը սեպտեմբերի 24-ին ՄԱԿ-ի կենտրոնակայանում հանդիպում է ունեցել ՄԱԿ-ի գլխավոր քարտուղար Անտոնիո Գուտերեշի հետ, վերջինս համոզմունք է հայտնել, որ Հայաստանի հետ արդյունավետ համագործակցությունն առավել կամրապնդվի եւ կզարգանա: Անդրադառնալով մեր երկրում տեղի ունեցած քաղաքական փոփոխություններին` ՄԱԿ-ի գլխավոր քարտուղարը նշել է, որ Հայաստանում իշխանությունը խաղաղ փոխանցելու գործընթացը փայլուն օրինակ է, եւ հույս է հայտնել, որ մեր երկիրը կընթանա վերընթաց զարգացման ճանապարհով` իրականացնելով նորանոր բարեփոխումներ տարբեր ուղղություններով:

Այնուհետեւ պաշտոնական հաղորդագրությունից տեղեկանում ենք. «Կողմերը մտքեր են փոխանակել Հայաստանում արտահերթ խորհրդարանական ընտրություններ անցկացնելու շուրջ եւ կարեւորել այնպիսի բարեփոխումների իրականացումը, որոնք նույնիսկ տեխնիկապես կբացառեն ընտրախախտումների հնարավորությունները: Այդ համատեքստում Նիկոլ Փաշինյանը կարեւորել է ՄԱԿ-ի կողմից տեխնիկական աջակցության շարունակական անհրաժեշտությունը»:

Երեւանի ավագանու ընտրությունների անցկացումից մեկ օր անց Հայաստանում արտահերթ խորհրդարանական ընտրությունների անցկացման թեման, այսպիսով, դարձել է միջազգային գործընկերների հետ քննարկումներում օրակարգային հարց:

Փաշինյանը ոչ միայն չէր կարող այս համոզիչ հաղթանակը չօգտագործել՝ խորհրդարանական ընտրությունների անցկացման անհրաժեշտության մեկնարկ ազդարարելով, այլեւ պարտավոր էր դա անել:

Ընտրություններում համոզիչ հաղթանակ տարած Հայկ Մարությանը ընտրությունների արդյունքների հրապարակումից հետո ճիշտ է նկատել. «Այս հաղթանակը մեր թիմի հաղթանակը չէ: Սա միայն ու միայն մեր ժողովրդի հաղթանակն է, որն ապացուցեց ամբողջ աշխարհին, որ միասնական եւ վճռական է ժողովրդավարական պետություն կառուցելու ճանապարհին»:

Ի դեպ, ընտրություններում մասնակցության թեմայի առնչությամբ տարբեր մեկնաբանություններ իսկապես տեղին չեն: Նախ՝ 2017թ. ընտրությունների համեմատ ընտրողների մասնակցությունը 25.000-ով ավելի է եղել։ Բացի այդ, պետք է հաշվի առնել այն հանգամանքը, որ մի քանի օր առաջ ընտրություններին մասնակցել է այն խավը, որը սովորաբար ՏԻՄ ընտրությունները բոյկոտում է, այսինքն՝ սեպտեմբերի 23-ին արել է գիտակցված ընտրություն: Սեպտեմբերի 23-ին չի մասնակցել այն «ընտրազանգվածը», որին տեղամասից տեղամաս կայուն կերպով տանում էին քվեարկության՝ ապահովելով «կազմակերպված» ընտրություններ, կամ էլ մասնակցել է՝ արդեն քվեարկելով ազատ: Չմոռանանք ընտրություններին մշտապես սրտատրոփ սպասող եւ բացառապես ընտրակաշառք ակնկալողներին, որոնք, թերեւս, երկար ընդմիջումից հետո նույնպես ազատորեն քվեարկել են, իսկ որոշ մասն էլ գուցե հարկ չի համարել գնալ ընտրությունների:

Այնպես որ, սեպտեմբերի 23-ի ընտրությունները պետք է համարել ամենաառողջ մթնոլորտում անցկացված ընտրությունները, որոնք լուրջ հիմք են թե՛ խորհրդարանական առաջիկա ընտրությունները ժողովրդավարական սկզբունքներին համապատասխան անցկացնելու համար, թե՛ առհասարակ Հայաստանի դրական իմիջի ձեւավորման ու Հայաստանի զարգացման տեսանկյունից:

Որ խորհրդարանական ընտրություններ անհրաժեշտ է անցկացնել եւ որքան շուտ, այնքան լավ՝ այստեղ երկրորդ կարծիք չկա: Երեւանի ավագանու ընտրությունների արդյունքները ցույց են տալիս խորհրդարանական ընտրություններ անցկացնելու հրամայականը՝ որպես հասարակության ձեւավորած պահանջ: Ընտրությունների արդյունքները վկայում են այն մասին, որ մեր հասարակությունը գնացել եւ կատարել է ընտրություն՝ մեծ հավատ ունենալով Փաշինյանի կառավարության նկատմամբ եւ ակնկալելով նրանից քաղաքական կամք՝ Հայաստանի հետագա զարգացման համար:

Սեպտեմբերի 23-ին ընտրություններին մասնակցած ուժերն արձանագրել են, որ Հայաստանում տեղի են ունեցել ազատ, արդար ընտրություններ, շնորհավորել են հաղթանակ տարած Երեւանի քաղաքապետի թեկնածուին եւ երեւանցիներին՝ առանց կեղծիքների, ընտրակաշառքների ու լցոնումների անցած ընտրությունների կապակցությամբ:

Սա բացառիկ իրավիճակ ու մթնոլորտ է Հայաստանի համար, երբ ընտրությունների արդյունքները կասկած չեն հարուցում ո՛չ հասարակության, ո՛չ ընտրություններին մասնակցած թեկնածուների մեջ: Շատերն արդեն հայտարարել են, որ սեպտեմբերի 23-ին կայացած ընտրությունները 1991 թվականից հետո Հայաստանում տեղի ունեցած բացառիկ արդար ընտրություններ էին:

Այս ընտրությունները, սակայն, լուրջ մտորելու առիթ պետք է դառնան Հայաստանի ողջ քաղաքական դաշտի համար՝ թե՛ իշխանության, թե՛ ընտրություններում պարտված ուժերի, թե՛ այդ ընտրություններին չմասնակցած՝ կողքից հետեւողների համար: Փաշինյանի կառավարությունը պետք է գիտակցի հասարակության վստահության ծանր բեռն ու պատասխանատվությունը, որը կրում է հասարակության այդ մեծ աջակցության համար: Իսկ ընտրություններում պարտված, ինչպես նաեւ կողքից հետեւած ուժերը պետք է իրենց հարց տան՝ ինչո՞ւ հայտնվեցին այս իրավիճակում, եւ փորձեն գտնել պատասխանները: Այս հարցերի պատասխաններն իրականում բոլորովին էլ բարդ չեն, պետք է պարզապես քաջություն ունենալ խոստովանելու սխալները ու մի կողմ քաշվելու:

ԷՄՄԱ ԳԱԲՐԻԵԼՅԱՆ

«Առավոտ», 26.09.2018