Այն պահին, երբ վարչապետ Նիկոլ Փաշինյանն Արարատի մարզի սահմանամերձ Երասխ գյուղի դպրոցի բակում հայտարարեց, որ այսուհետ երեխաները գնահատականները ոչ թե «բոնբոներկաների», այլ գիտելիքի դիմաց են ստանալու, դպրոցի պատից կախված շրջանակը, որի մեջ Հայաստանի օրհներգն էր, ընկավ ու ջարդուփշուր եղավ: Բարեբախտաբար, աշակերտները դրսում էին: Սակայն այս շրջանակը երեխաների անվտանգությանը, ինչու չէ՝ նաեւ կյանքին սպառնացող միակ վտանգը չէր այս դպրոցում: Երասխի դպրոցի մի մասնաշենքը 1992 թ.-ի ռմբակոծությունից ի վեր չի վերանորոգվել: Ճիշտ է, այստեղ դաս չեն պարապում, բայց այն գործող մասնաշենքին կպած է, ավելին` երեխաներն այդ հատվածով իրենց դասարաններ են անցուդարձ անում: Ռմբակոծության ենթարկված հատվածում դռները պոկված` կախված են, պատուհանները` ապակեզուրկ, պատերը՝ կիսափուլ: Դպրոցում շրջայց կատարելուց հետո Նիկոլ Փաշինյանը զարմացավ, որ 26 տարիների ընթացքում բյուջեում գումար չի գտնվել մի քանի հարյուր քառակուսի մետր դպրոցի մասնաշենքը վերանորոգելու համար:
«Առավոտ»
25.09.2018
