ԿԳ նախարար Արայիկ Հարությունյան. «Կառավարությունն ուզում է, որ բուհերը վերածվեն նաեւ հետազոտական գիտական կենտրոնների

ՀՀ ԿԳ նախարար Արայիկ Հարությունյանը եւ ՀՀ սպորտի եւ երիտասարդության հարցերի նախարար Լեւոն Վահրադյանը Ֆիզիկական կուլտուրայի հայկական պետական ինստիտուտում ներկա եղան «Սպորտ ԿԱԲ» գիտահետազոտական նորարարական կենտրոնի բացմանը: Տարածաշրջանում գիտահետազոտական այս միակ ստեղծվել է ԿԳՆ «Կրթական ծրագրերի կենտրոն» ԾԻԳ-ի կողմից իրականացվող «Կրթության բարելավում» վարկային ծրագրով՝ բուհին տրամադրված Նորարարությունների մրցակցային հիմնադրամի Ֆիզիկական կուլտուրայի եւ սպորտի ոլորտում մասնագիտական կրթության արդիականացում եւ բարելավում» դրամաշնորհային ծրագրի շրջանակներում:

Լրագրողների հետ ճեպազրույցում ԿԳ նախարարը նշեց, որ տպավորված է կենտրոնի հնարավորություններով: «Այս կենտրոնը ոլորտը մի քանի աստիճան վեր է բարձրացնում: Նոր կառավարությունը եւ ԿԳՆ-ն ցանկանում են, որպեսզի բուհերը վերածվեն նաեւ հետազոտական գիտական կենտրոնների: Եվ այս սարքավորումները, որ ներդրվել են, թույլ են տալիս հետազոտել մարզիկին տարբեր պարամետրերով, կատարել շտկումներ եւ բարելավել նրանց արդյունքները: Այսպիսի կենտրոն չենք ունեցել եւ սա տարածաշրջանում միակն է: Սա մեզ կօգնի բարձրացնել մարզիկների ցուցանիշերը, կօգնի բարձրացնել այս ինստիտուտի վարկանիշը: Գիտեմ, որ լավ սարքավորումներ եւ լաբորատորիա ունի Բժշկական համալսարանն իր վերականգնողական կենտրոնում, բայց սա կոնկրետ մարզիկների, այս ոլորտի համար է եւ դրանով առանձնանում է»,-ասաց Ա. Հարությունյանը:

Օգտվելով առիթից, որ գտնվում էինք մարզական կրթական օջախում, Aravot.am-ը Արայիկ Հարությունյանից հետաքրքրվեց, թե ինչ կասի հանրակրթական դպրոցներում ֆիզիկական կուլտուրա առարկայի դասավանդման վիճակի մասին: «Ստեղծված է աշխատանքային խումբ, որը քննարկում է դպրոցում ֆիզկուլտուրայի զարգացման տարբեր մոդելներ, որովհետեւ այն մոդելները, որոնք այսօր կան, որոշ չափով անարդյունավետ են՝ կապված մեր դպրոցներում հզորությունների բացակայության հետ: Ներկայումս կառավարությունը գույքագրում է իր բոլոր հնարավորությունները՝ դահլիճները, մարզական սրահները, որպեսզի օպտիմալ տարբերակ առաջարկի եւ առհասարակ հանրակրթական դպրոցներին եւ մարզադպրոցներին՝ օգտագործելով այն հնարավորությունները, որ ունի տվյալ համայնքը տվյալ մարզաձեւի առումով: Խրախուսելու ենք խմբակների ստեղծումը, գուցե նաեւ մարզական եւ դահլիճային հնարավորությունների բացակայության պայմաններում գտնենք մեթոդներ, որպեսզի ֆիզկուլտուրան լիարժեք դասավանդվի դպրոցներում», – ասաց նախախարը եւ, ըստ էության, չժխտեց մեր այն դիտարկումը, որ դպրոցների մեծ մասում սերունդը մեծանում է առողջական խնդիրներով:

Աշոտ ՀԱԿՈԲՅԱՆ