Շիրակի մարզի ընդհանուր իրավասության դատարանի դատավոր Լիլիթ Խաչատրյանի որոշմամբ Շիրակի պետական համալսարանի պատմության և փիլիսոփայության ամբիոնի վարիչ Հովհաննես Խորիկյանը վերականգնվեց իր պաշտոնում: Հիշեցնենք, որ Հովհաննես Խորիկյանին և Գագիկ Համբարյանին բուհից հեռացրել էր Շիրակի պետական համալսարանի նախկին ռեկտոր, ՀՀԿ-ական Սահակ Մինասյանը: Բուհի այս երկու աշխատակիցները պարբերաբար բարձրաձայնում էին նախկին ռեկտորի ապօրինությունների մասին՝ նշելով, որ վերջինս կործանման է տանում համալսարանը:
Այսօր «Դատալեքս» դատական տեղեկատվական համակարգում հրապարակվել է վճիռը, համաձայն որի Հովհաննես Խորիկյանի հայցը բավարարվում է ամբողջությամբ:
«Հայցը բավարարել ամբողջությամբ:
- «Շիրակի Մ. Նալբանդյանի անվան պետական համալսարան» հիմնադրամի ռեկտորի 15.03.2018թ.-ի թիվ 51 հրամանը ճանաչել անվավեր:
- Հովհաննես Գեորգու Խորիկյանին վերականգնել «Շիրակի Մ. Նալբանդյանի անվան պետական համալսարան» հիմնադրամի «պատմության և փիլիսոփայության» ամբիոնում` ամբիոնի վարիչ, դոցենտ պաշտոնում:
- «Շիրակի Մ. Նալբանդյանի անվան պետական համալսարան» հիմնադրամից հօգուտ Հովհաննես Գեորգու Խորիկյանի բռնագանձել հարկադիր պարապուրդի ժամանակահատվածի ամբողջ գումարը՝ ամսական միջինը 310.513 (երեք հարյուր տաս հազար հինգ հարյուր տասներեք) ՀՀ դրամի հաշվարկով:
- «Շիրակի Մ. Նալբանդյանի անվան պետական համալսարան» հիմնադրամից ՀՀ պետական բյուջե բռնագանձել 4000 (չորս հազար) ՀՀ դրամ՝ որպես ոչ գույքային պահանջի մասով վճարման ենթակա պետական տուրքի գումար:
- «Շիրակի Մ. Նալբանդյանի անվան պետական համալսարան» հիմնադրամից ՀՀ պետական բյուջե բռնագանձել պետական տուրք՝ հաշվարկվելիք և բռնագանձման ենթակա հարկադիր պարապուրդի գումարի 2 /երկու/ տոկոսի չափով:
- Դատական ծախսերի հարցը համարել լուծված:
- Դատարանի 16.04.2018թ.-ի և 02.08.2018թ. որոշումներով ձեռնարկված հայցի ապահովման միջոցները պահպանել մինչև վճռի օրինական ուժի մեջ մտնելը, այնուհետև՝ վերացնել:
- Վճիռը կամովին չկատարելու դեպքում այն կարող է կատարվել ԴԱՀԿ ծառայության միջոցով` պարտապանի միջոցների հաշվին:
- Վճիռը կարող է բողոքարկվել ՀՀ վերաքննիչ քաղաքացիական դատարան` հրապարակման պահից մեկամսյա ժամկետում»:
Նունե ԱՐԵՎՇԱՏՅԱՆ
