Հեռուստատեսության եւ ռադիոյի հանձնաժողովի իրավաբանական եւ լիցենզավորման վարչության պետ Դավիթ Մարգարյանը ԿԸՀ-ում լրատվամիջոցներին ներկայացրեց մշտադիտարկման հանձնաժողովի մշտադիտարկման արդյունքները:
«Մշտադիտարկումն ընթացքի մեջ է: Արդեն մեկ ընթացիկ հաշվետվություն եւ եզրակացություն հրապարակել ենք, որին բոլորը կարող են ծանոթանալ ինչպես մեր, այնպես նաեւ ԿԸՀ կայքում:
Կատարվել են բոլոր քայլերը: Մինչ այսօր մենք բողոք չունենք որեւէ խախտման վերաբերյալ, ինչպես նաեւ մեր կողմից չի արձանագրվել որեւէ խախտում: Ինչ վերաբերում է ամփոփիչ եզրակացությանը, դա կլինի ընտրությունների ամփոփումից երկու օր առաջ:
Ընդհանուր առմամբ կարելի է ասել, որ հավասարության կանոնը պահպանված է: Մենք խոսում ենք իրական հավասարության մասին, այլ ոչ թե րոպեների: Ես հստակ թվեր կարող էի ներկայացնել, բայց այսօր լռության օր է: Ընդհանուր արդյունքները կամփոփվեն ամփոփիչ օրը եւ բոլորը կկարողանան դրանց ծանոթանալ», – ասաց Դավիթ Մարգարյանը՝ արձանագրելով, որ վերգետնյա եթերային հեռարձակում իրականացնող հեռուստա եւ ռադիո ընկերությունները ապահովել են հավասար պայմաններ ընտրություններին մասնակցող բոլոր կուսակցությունների եւ դաշինքների համար:
Աշոտ ՀԱԿՈԲՅԱՆ
