«Իրազեկ քաղաքացիների միավորում» հ/կ-ի նախագահ Դանիել Իոաննիսյանը հայտնել է, թե ահազանգ են ստացել այն մասին, որ Արաբկիրի 4/20 տեղամասում հանձնաժողովի նախագահը «Լուսավոր Հայաստանի» կրծքանշան է կրել, ինչը դիտարկվում է որպես քարոզչություն և վարչական իրավախախտում: Ըստ նրա. դիտորդը նաև ահազանգել էր, որ հանձնաժողովի նախագահը խոչընդոտում է դիտորդի գործունեությանը:
Aravot.am-ի հետ զրույցում «Լույս» դաշինքի նախընտրական շտաբի ղեկավար Դավիթ Խաժակյանը մեկնաբանելով հնչեցված ահազանգը, նշեց «Ինչ վերաբերվում է «Լուսավոր Հայաստանի» կրծքանշանին, այն մշտապես ամրացված է մեր կուսակցության անդամների հագուստին, բայց եւ այնպես դա քարոզչական քայլ դիտարկելն անտրամաբանական եմ համարում: Այդ սիմվոլիկան որեւէ կերպ այս ընտրություններին չի օգտագործվել: Այդուհանդերձ, ես խնդրել եմ մեր հանձնաժողովի անդամին հանել այդ կրծքանշանը` լրացուցիչ շահարկումներից խուսափելու համար, բայց այդտեղ վարչական իրավախախման մասին խոսելն անիմաստ է, անհնար է դա ասոցացված համարել այս ընտրությունների հետ»:
Ինչ վերաբերվում է հանձնաժողովի նախագահի կողմից դիտորդի գործունեությունը խոչընդոտելու վերաբերյալ ահազանգին, այս մասին էլ Դավիթ Խաժակյանն ասաց հետեւյալը. «Ես բացառում եմ, որ մեր հանձնաժողովի անդամների կողմից նման բան լինի»:
Գոհար ՀԱԿՈԲՅԱՆ
