«Ոստիկանության բոլոր գործողությունները օրենքի շրջանակներում էին: Գործն օրենքով ընթացքի մեջ է: Ընթացքի մասին ձեզ կտեղեկացնենք»,- Նուբարաշենում Երևանի քաղաքապետ ընտրելուց հետո լրագրողների հետ զրույցում անդրադառնալով երեկ ԲՀԿ գրասենյակում ոստիկանների կատարած գործողություններին, այսպես արձագանքեց ՀՀ ոստիկանապետ Վալերիյ Օսիպյանը:
Հստակեցմանը՝ ընտրակաշառքի փաստի մասին ահազանգը հաստատվե՞ց, ոստիկանապետը պատասխանեց. «Այդ փաստն ուսումնասիրության մեջ է: Հենց որևէ բան լինի, պարզաբանումներ հետագայում կտրվեն»:
Հիշեցմանը՝ Նաիրա Զոհրաբյանը կատարվածը համարել է ր սուտ մատնություն և կոչ էր արել քրեական գործ հարուցել, Վալերիյ Օսիպյանն այսպես պատասխանեց. «Դա Նաիրա Զոհրաբյանի երևակայությունն է, որ մենք չենք տիրապետում իրավիճակին: Ոստիկանությունը տիրապետում է ողջ ՀՀ-ի օպերատիվ իրավիճակին: Ցանկացած ահազանգ, գրառում, որ տեղի է ունենում մեր օգտատերերի կողմից, ոստիկանությունը պարտադիր ուսումնասիրում է: Ի՞նչ է նշանակում չգնանք ահազանգի հետքերի հետևից»:
Հիշեցմանը՝ Նաիրա Զոհրաբյանը պահանջում է իր հրաժարականը, Վալերիյ Օսիպյանն այսպես արձագանքեց. «Է, թող պահանջի»:
Վալերիյ Օսիպյանը վստահեցրեց՝ այս պահին ընտրությունների ընթացքը նորմալ է, ընտրախախտումներ չեն արձանագրվել:
ՀՀ ոստիկանապետը հավաստիացրեց՝ այս անգամ լիարժեք մաքուր ընտրություններ են անցկացվելու:
Հարցին՝ հանուն ինչի՞ այսօր քվեարկեց, Վալերիյ Օսիպյանը պատասխանեց. «Այսօր քվեարկեցի հանուն մեր երեխաների լավ, բարեկարգ, գեղեցիկ, օրինապաշտ և բոլոր հայերի մայրաքաղաք Երևանի համար»:
Լրագրողների հարցերին՝ ելնելով որոշակի պահանջներից ինչպես Արթուր Վանեցյանը տեղափոխվեց ՀՀ կառավարական ամառանոց, ինքը չի՞ պատրաստվում տեղափոխվել Նուբարաշենից, Վալերիյ Օսիպյանը պատասխանեց. «Առայժմ ոչ մի տեղ չեմ պատրաստվում տեղափոխվել: Բնակվում եմ այստեղ՝ Նուբարաշենում»:
Տաթև ՀԱՐՈՒԹՅՈՒՆՅԱՆ
