«Եկեք իրար ներենք անձնական բնույթի վիրավորանքները». Փաշինյանը հորդորում է անձնական հարձակումները դադարեցնել ու ներել

Այսօր Երեւանի ավագանու ընտրությունների քարոզարշավի վերջին օրն է եւ վարչապետ Նիկոլ Փաշինյանը Կենտրոն համայնքում «Իմ քայլը» դաշինքի հրավիրած հավաքին ասաց, որ այսօր Բաղրամյան 26-ի դռները բացվեցին ՀՀ քաղաքացիների առաջ, բայց եւս մի կարեւոր խնդիր ունեն լուծելու՝ Ազգային ժողովի դռներն էլ պիտի բացվեն ՀՀ քաղաքացիների առաջ. «Հեղափոխության օրերին, երբ մենք մտնում էինք ԵՊՀ, Ռադիոյի շենք, կրթական հաստատություններ, բացում էինք փակ դռները, մեզ հարցնում էին՝ ինչո՞ւ եք դա անում: Ասում էինք, որ ՀՀ-ում ՀՀ քաղաքացու առաջ փակ դռներ չպետք է լինեն ու փակ դռներ չե՛ն լինելու»:

Փաշինյանը անդրադարձավ քարոզարշավին, ասաց, որ քննադատությունների մասին շատ է լսել ու շատ է մտածել. «Սա ազատ ժողովրդավարական երկրին հատուկ քարոզչություն էր, յուրաքանչյուր ուժ, այդ թվում իշխանությունը պայքարում է ամեն ձայնի համար եւ կրքերը կարող են բորբոքվել:

Ժողովրդավարությունը շատ մեծ եւ լուրջ պատասխանատվություն է, քննադատությունների ժամանակ պարզ է, որ նյարդերը կարող են տեղի տալ, բայց ամեն ինչ պիտի անենք անձնական բնույթի վիրավորանքները, անձնական բնույթի հարձակումները բացառելու համար: Հայաստանը պետք լինի քաղաքական հայացքների, սկզբունքների պայքար, բայց յուրաքանչյուրի իրավունքը պետք է պահպանվի ու պաշտպանվի»:

Վարչապետը հորդորեց, որ ամեն ինչ անեն, որ ամեն քաղաքական գործընթացի ժամանակ կրքոտ բանավիճեն, բայց հարաբերվելիս աշխատեն բացառել անձնական բնույթի հարձակումները, վիրավորանքները, ինքնասիրությունը վիրավորելը, արժանապատվությունը վիրավորելը. «Հենց այսպես՝ փոխադարձ հարգանքով իրար պետք է վերաբերվեն ՀՀ հպարտ քաղաքացիները՝ անկախ նրանից, թե որ կուսակցության անդամ են, ում են ընտրում, որովհետեւ մեր հեղափոխությունը սիրո եւ համերաշխության հեղափոխություն է: Այո՛, բոլորս սխալվում ենք, կրքերը բորբոքվում են, դա նորմալ է, եկեք իրար ներենք անձնական բնույթի վիրավորանքները»:

Նա ասաց, որ ով վիրավորվել է, թող ընդունի այս ներողության խոսքերը, որովհետեւ մեր երկիրը սիրո, իրավունքի, ժողովրդավարության երկիր է:

Հռիփսիմե ՋԵԲԵՋՅԱՆ