«Այս քարոզարշավը ոչ մի բանով չէր տարբերվում նախորդներից, բոլոր քաղաքական ուժերը ներկայացնում էին իրենց ծրագրերը, բայց միակ անախորժությունը ճամբարների բաժանումն էր, որը մտահոգել է ՀՅԴ-ին»,-Aravot.am-ի հետ զրույցում ամփոփելով Երեւանի ավագանու ընտրությունների նախընտրական քարոզարշավը, ասաց «Հայ հեղափոխական դաշնակցություն» կուսակցության ավագանու թեկնածու Դավիթ Հակոբյանը:
Հիշեցնենք, որ սեպտեմբերի քսաներեքին կայանալիք Երեւանի ավագանու ընտրություններում ՀՅԴ քաղաքապետի թեկնածուն է Միքայել Մանուկյանը: «Մենք մտահոգ ենք ոչ թե նրա, համար, որ ճամբարների բաժանումը կարող է ազդել մեր քվեների եւ քարոզարշավի վրա առհասարակ, այլ համոզված ենք, որ այս ընտրությունները պետք է ավելի համերաշխ մթնոլորտ տեղափոխեն հասարակությանը»,-վստահեցրեց Դավիթ Հակոբյանը:
Նրա խոսքով՝ երբ հասարակության շրջանում կան «սեւ» եւ «սպիտակ», «հեղափոխական» եւ «հակահեղափոխական» բնորոշումները, նշանակում է՝ քաղաքական դաշտը պառակտված է գնում ընտրություններին. «Իսկ դա ենթադրում է, որ ընտրություններից հետո հասարակությունն ավելի կպառակտվի: Հասարակությունը պետք է միավորված լինի՝ անկախ նրանից, թե ում ձայն կտան քաղաքացիները»:
Անդրադառնալով վարչապետ Նիկոլ Փաշինյանի՝ «Իմ քայլը» դաշինքի հավաքների ընթացքում ելույթներին եւ դրանց ազդեցությանը հանրության կարծիքի ձեւավորման վրա, Դավիթ Հակոբյանը նկատեց. «Իշխող ուժը մշտապես թեկնածու ունի, ինչպես այս դեպքում: Բնականաբար, նորմալ է, որ վարչապետն իր ելույթներով պաշտպանում է իր թեկնածուին, բայց ընտրողը պետք է հասկանա, որ չնայած վարչապետի հանդեպ հասարակության դրական վերաբերմունքին, նոր եւ լուսավոր Հայաստանի տեսականը դեռ նկատելի չէ: Դեռ աշխատանք պետք է տեսնենք, առաջընթաց եւ զարգացում»: Ըստ Դավիթ Հակոբյանի՝ «վարչապետն ում ասում է՝ նրան ընտրենք» սկզբունքով առաջնորդվելը ճիշտ չէ. «Թեկնածուի կարողություններին պետք է նայել, որովհետեւ քաղաքապետն է կառավարելու Երեւանը, ոչ թե վարչապետը, նա երկիր կառավարողն է»:
Լուիզա ՍՈՒՔԻԱՍՅԱՆ
