«Քաղաքական փոփոխությունները չեն կարող ազդել մեր անկախության վրա, հակառակը՝ ամրապնդում ենք մեր անկախությունը». Դավիթ Տոնոյան

Այսօր նախագահի նստավայրում Անկախության տոնի առթիվ պետական պարգեւներով պարգեւատրման արարողությանը մասնակցում էր նաեւ ՊՆ նախարար Դավիթ Տոնոյանը:

Լրագրողները նախարարից հետաքրքրվեցին, թե սահմանում իրավիճակն ինչպիսին է: Նախարարը պատասխանեց. «Սահմանները հարաբերական կայունություն ունեն, մենք որոշ գործողություններ ենք իրականացրել, որի արդյունքում ե՛ւ հյուսիսային սահմանում, ե՛ւ պաշտպանական բանակում այս պահին հարաբերական կայուն է»:

Խոսելով Անկախության տոնի մասին՝ Դավիթ Տոնոյանն ասաց, որ սա ամենաբաղձալի տոնն է. «Սրանից ավել ես որեւիցե մեկ այլ տոն, որը նշում է պետականությունը, քաղաքական առումով չեմ տեսնում»:

Հարցին՝ հաճախ նշվում է, որ ամեն դեպքում կիսանկախ է Հայաստանը՝ նախարարը միանգամից արձագանքեց՝ «Չկա տենց բան: Մենք 1991-ի սեպտեմբերի 21-ին ձեռք ենք բերել անկախություն եւ ինքնակառավարվում ենք շատ ազնիվ կերպով: Բոլոր քաղաքական փոփոխությունները, վայրիվերումները չեն կարող ազդել մեր անկախության վրա, հակառակը՝ ամրապնդում ենք մեր անկախությունը»:

Դիտարկմանը, թե մեր երկիրը փոքր է ցավոք, ի վիճակի՞ է դիմակայել արտաքին մարտահրավերներին՝ Դավիթ Տոնոյանը պատասխանեց. «Մեր երկիրը ոչ թե ցավոք, մեր երկիրը ինչքան կա՝ այնքան կա, մենք դիմագրավում ենք, նաեւ ազդում ենք բոլոր գործընթացների վրա»:

Հարցին՝ մենք երազում ենք ոչ թե երկու հայկական պետության, այլ միասնական Հայաստանի մասին, դուք միասնական Հայաստանին կողմնակի՞ց եք՝ Դավիթ Տոնոյանը պատասխանեց. «Ես արդեն միասնական Հայաստանն եմ կառուցում»:

Հռիփսիմե ՋԵԲԵՋՅԱՆ