Այսօր Արամ Խաչատրյան արձանի մոտ «Ժառանգություն» կուսակցությունն ամփոփում էր Երեւանի ավագանու ընտրությունների քարոզարշավը:
Ավագանու անդամի «Ժառանգության» թեկնածու Արմեն Մարտիրոսյանն իր ելույթում ասաց, որ այսօր մի իրավիճակ է, երբ քաղաքացու համար դժվարին ընտրություն է լինելու.«Որովհետեւ այն փոփոխությունները, որոնք ապրիլին սկսվեցին, որին «Ժառանգությունը» շատ ակտիվ մասնակցում էր տարբեր ուղղություններով, սկսած Նիկոլ Փաշինյանի քայլարշավով, վերջացրած՝ «Հանուն Հայաստան պետության» ճակատով, այդ փոփոխությունները պետք է զարգացման հիմք լինեն: Պարտադիր պետք է կառուցվածքային եւ համակարգային փոփոխությունների հիմք լինեն: Ուստի քաղաքացիների ընտրությունը պետք է լինի այն ուժերի միջեւ, որոնք վաղվա օրակարգ ունեն ոչ միայն այս տարիների ընթացքում, այլեւ՝ այդ վաղվա օրակարգի համար պայքարել են: Ես պարզ ճակատով կարող եմ ասել՝ «Ժառանգությունը» այդ կուսակցություններից, կազմակերպություններից մեկն է»:
Մարտիրոսյանը արձագանքելով այն հարցադրումներին՝ արդյոք չի թուլացել «Ժառանգությունը», ասաց.«Կարող է ֆիզիկապես թուլացել է, բայց պայքարի հստակ, հաստ հետագիծ է թողել: Ի՞նչ է, ձեզ թվում էր՝ հե՞շտ էր անցած ռեժիմների օրոք անընդհատ պայքարել, գայթակղություններին չտրվել: Ցավոք, որոշ ուժեր չդիմացան պայքարին, մնացին նվիրյալները: Որպեսզի մենք կարողանանք վաղվա կառավարման համակարգը ճիշտ ստեղծենք, նոր Սահմանադրություն ընդունենք՝ ժողովրդի, պետության հագով, հանգիստ խղճով ձեր քվեն տվեք «Ժառանգությանը»:
Նելլի ԲԱԲԱՅԱՆ
