Գնահատման եւ թեստավորման կենտրոնը (ԳԹԿ) գիտելիքի արտաքին գնահատում է անցկացնելու հանրապետության մի շարք դպրոցների ավարտական 12-րդ դասարաններում՝ հայոց լեզու եւ հանրահաշիվ առարկաներից։
Գործընթացը կսկսվի սեպտեմբերի 24-ին եւ կտեւի մինչեւ հոկտեմբերի 20-ը։ Դրանում կընդգրկվեն 157 հանրակրթական հաստատություններ՝ մարզերում եւ 20-ը՝ Երեւանում։ Տեղեկությունը փոխանցեց Գնահատման եւ թեստավորման կենտրոնի տնօրենի ժամանակավոր պաշտոնակատար Արմեն Փաշայանը։ 7 հազար աշակերտ քննություն կհանձնի հայոց լեզվից եւ 7 հազարը՝ հանրահաշվից։
Ինչ վերաբերում է ԳԹԿ-ի կողմից անցկացվելիք ավարտական քննությունների ժամկետին, Արմեն Փաշայանի՝ քննարկվում է, որ դրանք պետք է լինեն մայիսի առաջին շաբաթվա ընթացքում։ Նա նկատեց, որ թեպետ ուսումնական գործընթացը դպրոցներում եզրափակվում է մայիսի 20-ին, բայց ծրագիրն ավարտված է լինում ավելի վաղ, ու մնացած ժամանակը տրամադրվում է թեմաների կրկնողությանը։ Արմեն Փաշայանը կարծում է, որ նոր առաջադրված խնդիրը ԳԹԿ-ն կկարողանա պատշաճ ձեւով հաղթահարել ու հաջորդիվ անցնել միասնական քննությունների անցկացմանը։
Աննա ԶԱԽԱՐՅԱՆ
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում
