Նոյեմբերի 9-ից 28-ը Լոնդոնում կկայանա շախմատի աշխարհի չեմպիոնի կոչման համար մրցամարտը, որում հավակնորդ Ֆաբիանո Կարուանան կփորձի աշխարհի չեմպիոն Մագնուս Կարլսենին գահընկեց անել:
Կողմերի համաձայնությամբ ՖԻԴԵ-ն մրցամարտի գլխավոր մրցավար նշանակել է հայաստանցի միջազգային կարգի մրցավար Աշոտ Վարդապետյանին:
Բացառիկ երեւույթ է շախմատի պատմության մեջ, որ արդեն երրորդ անգամ աշխարհի գերհզոր գրոսմայստերները եւ ՖԻԴԵ-ն չեմպիոնի եւ հավակնորդի շախմատային ճակատագիրը վստահում են նույն մասնագետին:
Աշոտ Վարդապետյանը եղել է նաեւ Վիշվանաթան Անանդ-Բորիս Գելֆանդ (2012թ.) եւ Վիշվանաթան Անանդ-Մագնուս Կարլսեն (2013 թ.) չեմպիոնական մրցամարտերի գլխավոր մրցավարը:
Աշոտ ՀԱԿՈԲՅԱՆ
